ऑनलाइन लोकमत
नवी दिल्ली, दि. 22 - अपघातग्रस्त कारला ट्रक हायवेवरुन फरफटत नेत असल्याचा एक नाट्यमय व्हिडीओ सध्या सोशल मीडियावर व्हायरल होत आहे. कॅलिफोर्निया हायवेवरील हा व्हिडीओ आहे. कारने ट्रकला धडक दिल्यानंतर तिचा चक्काचूर झाला होता. पण गाडी ट्रकमध्येच अडकली होती, ज्याची ड्रायव्हरला जराही कल्पना नव्हती. त्यामुळे ट्रकसोबत कारही हायवेवरुन फरफटत जात होती. कारचालक हात दाखवून कोणातरी ट्रक थांबवा अशी विनंती करत होता. 20 एप्रिल रोजी शेअर करण्यात आलेला हा व्हिडीओ 60 लाखांहून जास्त लोकांनी पाहिला आहे.
लॉस एंजेलिस टाईम्सने दिलेल्या वृत्तानुसार ट्रकने किमान दीड किलोमीटरपर्यंत कारला आपल्यासोबत फरफटत नेलं. या ट्रकमधून गाजराची वाहतूक करण्यात येत होती. लेन बदलत असताना कारने ट्रकला मागून धडक दिली होती. आपल्या ट्रकमागे कार फरफटत असल्याची ट्रकचालकाला अजिबात कल्पना नव्हती.
या व्हिडीओत कारचालक हात दाखवत ड्रायव्हर ट्रक थांबत नसल्याचं सांगताना दिसत आहे. हायवेवरुन जाणा-या इतर वाहनचालकांनी अखेर ट्रक थांबवून सुटका केली.
फेसबूकवर शेअर करण्यात आलेला हा व्हिडीओ व्हायरल झाला असून आतापर्यंत 60 लाख लोकांनी तो पाहिला आहे. तसंत एक लाखाहून जास्त लोकांनी शेअर केला आहे.