ऑनलाइन लोकमत
नवी दिल्ली, दि. 18 - चालत्या ट्रेनमधून उतरणे किती धोकादायक असू शकते हे अनेकदा पाहायला मिळालं आहे. अनेकदा अशा घटनांमध्ये एखाद्या व्यक्तीचा जीव जाण्याची शक्यता असते. सध्या असाच एक व्हिडीओ सोशल मीडियावर व्हायरल होत आहे, ज्यामध्ये निष्काळजीपणामुळे एका तरुणाचं बोट ट्रेनच्या दरवाजात अडकतं, आणि इतक्यात ट्रेन सुरु होते. आपलं बोट अडकलं असल्याने तरुणाला ट्रेनसोबत धावावं लागतं. ट्रेनचा वेग वाढण्याआधीच आपलं फसलेलं बोट बाहेर काढण्यात तरुण यशस्वी झाला. मिळालेल्या माहितीनुसार त्याचा जीव वाचला आहे.
चीनमधील पीपल्स डेलीच्या वृत्तानुसार, ही घटना चीनच्या जियांग्सूमधील आहे. ट्रेनमध्ये चढलेल्या या तरुणाच्या लक्षात आलं की आपण चुकीची ट्रेन पकडली आहे. यानंतर त्याची ट्रेनमधून उतरण्यासाठी धावाधाव सुरु झाली. मात्र या घाईगडबडीत त्याचं बोट दरवाजात अडकलं. बोट काढण्याचा प्रयत्न करत असतानाच ट्रेन सुरु झाली. ट्रेन सुरु झाल्यावर तरुणाला ट्रेनसोबत धावण्याशिवाय पर्याय नव्हता. उपस्थित लोकांनी ट्रेन ड्रायव्हरला इशारा देत ट्रेन थांबवण्याचा प्रयत्न केला. ही सर्व घटना सीसीटीव्हीत कैद झाली आहे.