ऑनलाइन लोकमत
वॉशिंग्टन, दि. 23 - रिपब्लिकन पक्षाचे अमेरिकेच्या राष्ट्रपती पदासाठीचे उमेदवार डोनाल्ड ट्रम्प पुन्हा एकदा अडचणीत सापडले आहेत. आता अजून एका महिलेने ट्रम्प यांच्यावर लैंगिक शोषण करण्याचा प्रयत्न केल्याचा आरोप केला आहे. ट्रम्प यांनी जबरदस्तीने किस करून सोबत रात्र घालवण्यासाठी दहा हजार डॉलर देण्याची ऑफर दिल्याचा आरोप या पॉर्नस्टार महिलेने केला आहे.
अमेरिकेच्या अध्यक्षीय निवडणुकीसाठी आता एक महिन्याचा अवधी उरला आहे. त्या पार्श्वभूमीवर होत असलेल्या लैंगिक शोषणाच्या आरोपांमुळे ट्रम्प यांची निवडणुकीतील स्थिती बिकट झाली आहे. आता प्रौढ चित्रपटात काम करणाऱ्या जेसिका ड्रेकने केलेल्या आरोपांमुळे ट्रम्प यांचा पाय खोलात जाण्याची शक्यता आहे. लॉस एंजलिस येथे आयोजित एका पत्रकार परिषदेत ड्रेक म्हणाली, "दहा वर्षापूर्वी कॅलिफोर्नियातील लेक ताहो येथे माझी ट्रम्प यांच्याशी भेट झाली होती. मला ट्रम्प यांच्या हॉटेलमधील खोलीत बोलावण्यात आले होते."
42 वर्षीय ड्रेक हिने आरोप केला आहे की, "या भेटीवेळी ट्रम्प यांनी मला आणि माझ्या दोन मैत्रिणींना पकडले. तसेच जबरदस्तीने चुंबनही घेतले. त्यावेळी ट्रम्प यांनी मला दहा हजार डॉलर देण्याची ऑफर दिली. त्यानंतर ट्रम्प यांच्यावतीने एका व्यक्तीने फोन करून मला एकट्याने ट्रम्प यांच्या खोलीत येण्यास सांगितले. मात्र मी त्याला नकार दिला." दरम्यान, ट्रम्प यांच्या प्रचार अभियान दलाने या आरोपांचे खंडन केले आहे.