ऑनलाइन लोकमत
बिजिंग, दि. 22 - भारताच्या अणुपुरवठादार देशांच्या संघटनेतील (एनएसजी) प्रवेशात खोडा घालण्यासाठी चीनने पुन्हा एकदा कंबर कसली आहे. पुढील महिन्यात होणाऱ्या एनएसजी सदस्य देशांच्या बैठकीपूर्वी भारताच्या एनएसजीमधील प्रवेशाबाबतच्या आपल्या भूमिकेत कोणत्याही प्रकारचा बदल झाला नसल्याचे चीनने आज स्पष्ट केले आहे. चीनच्या या भूमिकेमुळे भारताचा एनएसजीमधील प्रवेश पुन्हा एकदा लांबण्याची शक्यता निर्माण झाली आहे.
गेल्या अनेक वर्षांपासून एनएसजीचे सदस्यत्व मिळवण्यासाठी भारत प्रयत्नशील आहे. मात्र या संघटनेच्या नियमांनुसार नव सदस्य म्हणून भारताला प्रवेश देण्यासाठी चीनची भूमिका महत्त्वपूर्ण आहे. मात्र अण्वस्र प्रसार बंदी करारावर (एनपीटी) सही न केलेल्या देशास एनएसजीचे सदस्यत्व देण्यास आपला विरोध कायम असल्याचे चीनच्या परराष्ट्र मंत्रालयाच्या प्रवक्त्या हुआ चुनाइंग यांनी आज सांगितले.
स्वीत्झर्लंडच्या राजधानीत होणाऱ्या एनएसजीच्या बैठकीत भारताला एनएसजीमध्ये प्रवेश मिळण्याबाबतच्या शक्यतेवर बोलताना त्यांनी ही माहिती दिली. भारताने एनएसजी सदस्यत्वासाठी अर्ज दाखल केल्यानंतर पाकिस्ताननेही चीनच्या पाठिंब्यावर एनएसजीच्या सदस्यत्वासाठी अर्ज दाखल केला होता.
भारताच्या एनएसजीमधील प्रवेशाला अमेरिकेसह अनेक पाश्चिमात्य देशांनी पाठिंबा दर्शवलेला आहे. मात्र चीनने अण्वस्त्र प्रसार बंदी करारावर सह्या केल्याशिवाय कुठल्याही नव्या देशाला सदस्यत्व देऊ नये, अशी भूमिका घेतली आहे. भारताने अणवस्त्र प्रसारबंदी (एनपीटी) करारावर अद्याप सही केलेली नाही.