धूम्रपान करणारी चिमणी?

हा फोटो पाहून तुम्हाला चिमणी सिगारेट ओढत आहे, असे वाटेल. मात्र, वास्तव वेगळेच आहे. ही चिमणी सिगारेट ओढत नसून एकाने बळजबरीने तिच्या चोचीत सिगारेट कोंबली होती

मॉस्को : हा फोटो पाहून तुम्हाला चिमणी सिगारेट ओढत आहे, असे वाटेल. मात्र, वास्तव वेगळेच आहे. ही चिमणी सिगारेट ओढत नसून एकाने बळजबरीने तिच्या चोचीत सिगारेट कोंबली होती. सोशल मीडियात व्हायरल हा फोटो पाहून प्राणिमित्रांचा संताप झाला. त्यांनी सोशल मीडियाचाच वापर करून चिमणीला धूम्रपानास भाग पाडणाऱ्याचा छडा लावला. व्हिक्टर एवदीव असे त्याचे नाव असून, तो रशियन आहे. आपण गमतीत हे कृत्य केले, असे त्याने सांगितले. व्हिक्टर कारमधून जात होता. वाटेत त्याने एका ठिकाणी कार उभी केली. तेव्हा ही चिमणी कारमध्ये आली. मग काय व्हिक्टरने कारच्या खिडक्या वर करून तिला आत बंद केले. नंतर व्हिक्टरने सिगारेट पेटवून ती चिमणीच्या चोचीत कोंबली. सिगारेट ओढणाऱ्या या चिमणीचे दोन फोटो समाजमाध्यमावर व्हायरल झाले होते. एका फोटोत तिने काडेपेटीतील पेटती काडी चोचीत धरली आहे, तर दुसऱ्या छायाचित्रात तिच्या चोचीत पेटलेली सिगारेट दिसते. प्राण्यांच्या संरक्षणासाठी काम करणाऱ्या संस्थांना या घटनेची माहिती मिळताच त्यांनी समाजमाध्यमाद्वारे व्हिक्टरचा छडा लावला. सध्या या प्रकरणाची चौकशी सुरू आहे. व्हिक्टर यात दोषी आढळून आला, तर त्याला एक वर्षाचा कारावास किंवा ७० हजार रुपयांचा दंड होऊ शकतो.