बांगलादेशच्या माजी पंतप्रधान शेख हसिना यांच्याविरोधात सुरू असलेल्या खटल्यादरम्यान वकिलांनी रविवारी त्यांच्यावर गंभीर आरोप केले. २०२४ साली बांगलादेशमध्ये पेटलेल्या विद्यार्थी आंदोलनादरम्यान झालेल्या हिंसक कारवाईमधील त्यांच्या भूमिकेवरून शेख हसिना यांच्याविरोधात हे आरोप करण्यात आले आहेत.
शेख हसिना यांनी स्वत: सरकारी सुरक्षा यंत्रणा, आपला पक्ष आणि त्याच्याशी संबंधित यंत्रणांना थेट आदेश दिले. त्यामुळे या आंदोलनादरम्यान, मोठ्या प्रमाणावर लोकांचा मृत्यू झाला, असा दावा एका तपास अहवालामधून करण्यात आला आहे.
बांगलादेशमधील देशांतर्गत आंतरराष्ट्रीय क्राईम ट्रिब्युनलचे चीफ प्रॉसिक्युटर मोहम्मद ताजुल इस्लाम यांनी रविवारी सांगितले की, या हत्या पूर्वनियोजित होत्या. त्यांनी व्हिडीओ पुरावे आणि विविध एजन्सींदरम्यान झालेल्या एन्क्रिप्टेड संभाषणांचा हवाला देत हा दावा केला. त्यांनी पुढे सांगितले की, पुराव्यांचा केलेल्या सखोल तपासानंतर हा एक संघटित, व्यापक आणि सूनियोजित हल्ला होता, या निष्कर्षापर्यंत आम्ही आलो आहोत. शेख हसिना यांनी आंदोलनाला चिरडण्यासाठी सर्व सुरक्षा यंत्रणा आणि आपल्या पक्षाच्या हत्यारबंद कार्यकर्त्यांना मोकळं सोडलं होतं., असा दावाही त्यांनी केला.
सरकारच्या प्रमुख म्हणून सुरक्षा दलांनी केलेल्या कारवाईची पूर्ण जबाबदारी ही शेख हसिना यांची आहे, असेही चीफ प्रॉसिक्युटर मोहम्मद ताजुल इस्लाम यांनी पुढे सांगितले.