ऑनलाइन लोकमतहाँगकाँग, दि. 5 - 7.1 कोटी डॉलर म्हणजे सुमारे 462 कोटी रुपयांत दुर्मिळ प्रकारचा गुलाबी हिरा विकला गेला आहे. हाँगकाँगमधील सोदबी ऑक्शनमध्ये या हिऱ्याची विक्रमी किंमतीत विक्री झाली. चॉव ताई फूक इन्टरप्रायझेसने या हिऱ्याला बोली लावून तो विकत घेतला आहे. लिलावासाठी उपलब्ध असलेला आतापर्यंतचा हा सर्वात मोठा पॉलिश हिरा आहे. सर्वात मोठ्या लिलावाचा विक्रम ओपनहायमर ब्लू या हिऱ्याच्या नावे होता. मागील वर्षी मे महिन्यात 5 कोटी डॉलर म्हणजेच 235 कोटी रुपयांत या हिऱ्याचा लिलाव झाला होता.अंड्याच्या आकाराचा हा पिंक स्टार 59.6 कॅरेटचा हिरा आहे. लिलावाला सुरुवात होताच, अवघ्या पाच मिनिटातच याची विक्री झाली. दरम्यान, जिनिव्हामध्ये 2013 मध्ये झालेल्या लिलावात या हिऱ्याला 8.3 कोटी डॉलरची बोली लागली होती. पण नंतर खरेदीदाराला तेवढे पैसे देता आले नाही. हिऱ्यांची विक्री करणारे 77 डायमंड्सचे अलेक्झांडर ब्रेकनर यांनी सांगितलं की, इतिहासातील हा सर्वात मोठा गुलाबी हिरा आहे. रंगामुळे हिऱ्याला विशेष महत्त्व प्राप्त झालं आहे. या हिऱ्याची किंमत जवळपास सहा कोटी डॉलर असेल असा अंदाज होता. डी बीयर्सने 1999 मध्ये आफ्रिकेच्या बोत्सवानामधील खाणीतून हा हिरा शोधला होता. यानंतर स्टेनमेत्ज डायमंड्सने दोन वर्षात त्याला पैलू पाडून चमकावलं. सुरुवातीला हा हिरा 132.5 कॅरेटचा होता. पण पैलू पाडून आणि पॉलिश करुन तो 59.60 कॅरेटचा झाला.
462 कोटी रुपयांत विकला गेला गुलाबी हिरा
By admin | Updated: April 5, 2017 15:24 IST