ऑनलाइन लोकमत
वॉशिंग्टन, दि. 30 - अमेरिकेत मुस्लिम बहुल देशांतील लोकांना बंदी घालण्याच्या यादीत आगामी काळात पाकिस्तानचेही नाव समाविष्ट केले जाण्याची शक्यता आहे, असे संकेत व्हाईट हाऊसमधील एका वरिष्ठ अधिका-याने दिले आहेत. कट्टरतावादी मुस्लिम दहशतवाद्यांना दूर ठेवण्यासाठी इराक, सीरिया, येमेन, सुदान, लिबिया, सोमालिया या सात देशांतील लोकांना अमेरिकेमध्ये सध्या नो एन्ट्री लागू करण्यात आली आहे.
व्हाईट हाऊसचे वरिष्ठ अधिकारी रियन्स प्रीबस यांनी सांगितले की,'अमेरिका प्रवेशबंदी करण्यात आलेल्या 7 देशांमध्ये घातक, धोकादायक दहशतवाद निर्माण होत असल्याचे काँग्रेस आणि तत्कालीन ओबामा प्रशासनाच्या निदर्शनास आले. याच कारणामुळे या देशांतील लोकांना अमेरिका प्रवेशबंदीचा निर्णय घेण्यात आला'. यासंबंधी जारी करण्यात आलेल्या आदेशावर अमेरिकेचे राष्ट्राध्यक्ष डोनाल्ड ट्रम्प यांनी स्वाक्षरी केली.
प्रीबस यांनी असेही सांगितले की, 'ज्या अन्य काही देशांमध्ये अशाच प्रकारच्या समस्या आहेत, त्या देशांविरोधातही ट्रम्प इशारा करण्याची शक्यता आहे. सध्याचे पाऊल तात्काळ असून या देशांत जाणारे आणि येणा-या लोकांची कसून तपासणी केली जाईल'.
दरम्यान, सात मुस्लिम देशांतून स्थलांतर करणाऱ्यांवर अमेरिकेतील प्रवेशावर घालण्यात आलेल्या बंदीच्या निषेधार्थ अमेरिकेचे राष्ट्राध्यक्ष डोनाल्ड ट्रम्प यांच्याविरोधात अमेरिकेत नागरीक निदर्शने करत आहेत. सर्वच स्तरातून त्यांच्या या निर्णयाचा विरोध केला जात आहे. सर्वच त्यांच्यावर टीका होत असली तरी हा निर्णय योग्य असून त्याची व्यवस्थित अंमलबजावणी होत असल्याचे डोनाल्ड ट्रम्प यांनी रविवारी सांगितले.
तसेच ही सरसकट सर्व मुस्लिमांवरील बंदी नसून त्यातून कट्टरतावादी मुस्लीम व दहशतवाद्यांवर नियंत्रण आणण्याचा प्रयत्न आहे, असे ट्रम्प यांनी स्पष्ट केले. याशिवाय लॉबिंग बंदी, इस्लामिक स्टेटचा पराभव करण्याची योजना तसेच राष्ट्रीय सुरक्षा परिषदेला बलशाली करण्याची योजना यांच्यावरही ट्रम्प यांनी स्वाक्षरी केली आहे.
या व्यूहरचनेमुळे अमेरिका इसिसविरोधात निर्णायक पाऊल उचलू शकेल. अमेरिका तोंड देत आहे तो मूलतत्ववादी इस्लामी दहशतवाद एवढाच इसिसचा धोका नाही तर ती खूपच विषारी आणि आक्रमक संघटना आहे. ती स्वत:चे राज्य स्थापन करण्याचा प्रयत्न करीत आहे. या संघटनेत चर्चेला, वाटाघाटींना जागा नाही, असे ट्रम्प यांनी सांगितले.