CoronaVirus: 'लंडनचे वाधवान' लॉकडाऊनमध्ये प्रायव्हेट जेटने फ्रान्सला जातात तेव्हा...

महाराष्ट्रात वाधवान प्रकरण घडण्यापूर्वी तशीच काहीशी घटना फ्रान्समध्ये घडली

- कुणाल गवाणकर

राज्यात कोरोनानं धुमाकूळ घातला असताना, त्यामुळे लॉकडाऊन सुरू असताना येस बँक घोटाळा प्रकरणातल्या वाधवान कुटुंबानं सुखेनैव प्रवास केला. सामान्य माणसं आपापल्या घरी परतण्यासाठी शेकडो किलोमीटर चालत असताना वाधवान कुटुंब आलिशान गाड्यांमधून महाबळेश्वरला पोहोचलं. कारण त्यांच्याकडे गृहसचिव अमिताभ गुप्ता यांचं पत्र होतं. त्या पत्रानं त्यांचा लॉकडाऊनमधला प्रवास सुखकर केला. आपल्याकडे हे घडण्यापूर्वी गेल्याच आठवड्यात अशीच एक घटना फ्रान्समध्ये घडली. पण तिथे जे घडलं ते महाराष्ट्रापेक्षा वेगळं आणि भारी होतं.

चार एप्रिल, शनिवार.. ठिकाण- फ्रान्समधलं मार्सेलंडनमधून सुट्टी घालवण्यासाठी काही अतिश्रीमंत व्यक्तीचं खासगी जेट मार्सेमध्ये उतरलं. खरंतर स्थानिक प्रशासनानं त्यांना विमान परवानगी नाकारली होती. मात्र तरीही जेट मार्सेमध्ये उतरवण्यात आलं. त्या जेटमध्ये चाळीशी, पन्नाशीतले सात पुरुष आणि विशीतल्या तीन तरुणी होत्या. जेट उतरल्या उतरल्या स्थानिक पोलिसांनी धाव घेतली आणि सुरू झाला चौकशीचा सिलसिला.मार्सेमध्ये दाखल झालेली अतिश्रीमंत मंडळी 'एम्ब्रार लिगसी 600' या जेटनं जेटनं आली होती. या जेटची किंमत आहे ५ मिलियन पौंड. त्यावरुन जेटमधल्या मंडळींच्या श्रीमंतीची कल्पना यावी. लंडनहून जवळपास साडे सातशे किलोमीटर अंतर पार करून आलेली ही मंडळी पुढे कान्सला जाणार होती. त्यासाठी तीन हेलिकॉप्टर्सदेखील सज्ज होती. ब्रिटनमध्ये बँकिंग आणि एस्टेट कंपनीत काम करणाऱ्या एका क्रोएशियन व्यक्तीनं या संपूर्ण दौऱ्याचं आयोजन केलं होतं. जेट, हेलिकॉप्टरपासून ते अगदी कान्समधला व्हिला भाड्यानं घेण्याची सर्व जबाबदारी याच व्यक्तीनं उचलली होती. या व्हिलाचं एका दिवसाचं भाडं ५० हजार पौंड म्हणजेच भारतीय रुपयांत साधारणत: ४७ लाखांहून अधिक आहे.

कोरोनामुळे फ्रान्समध्ये लॉकडाऊन असल्यानं मार्सेतल्या पोलिसांनी जेटमधल्या सगळ्यांची चौकशी सुरू केली. तितक्यात क्रोएशियन व्यवसायिक मध्येच बोलला. 'माझ्याकडे पैसे आहेत. आपण बोलू. विमानात माझे मित्र आहेत. काही तरुणींसोबत (एस्कॉर्ट्स) आम्ही ब्रेक घेण्यासाठी चाललो आहोत. आम्ही इथून थेट व्हिलावर जातोय. कुणालाही कळणार नाही. कोणतीही समस्या निर्माण होणार नाही.' व्यवसायिकानं पोलिसांना थेट पैसे देऊन पटवण्याचा प्रयत्न केला.क्रोएशियन व्यक्तीच्या ऑफरकडे दुर्लक्ष करत पोलिसांनी जेटमध्ये बसलेल्या श्रीमंतांची आणखी चौकशी सुरू केली. कोण, कुठले याची विचारणा केल्यावर क्रोएशियन व्यक्तीसोबत असलेले दहा जण जर्मन, फ्रेंच, रोमानिया आणि युक्रेनचे असल्याची माहिती मिळाली. काही अतिमहत्त्वाच्या कामासाठी जाताय का, काही तातडीचं काम आहे का, असे प्रश्न विचारण्यात आले. मात्र एकालाही समाधानकारक उत्तर देता आलं नाही. हे सगळं सुरू असताना पोलिसांना लाच देण्याचा प्रयत्न अनेकदा झाला. मात्र पोलिसांनी चौकशी सुरूच ठेवली.

जगात सर्वत्र कोरोनाची दहशत असताना काही आनंदाचे क्षण मिळावेत, यासाठी सर्व मंडळी लंडनहून मार्सेला आल्याचं आणि तिथून पुढे कान्सच्या व्हिलावर जाणार असल्याचं पोलिसांना समजलं. यानंतर पोलिसांनी तिथे आलेल्या हेलिकॉप्टर्सच्या तीन वैमानिकांकडे मोर्चा वळवला. तिघांना जबर दंड ठोठावला. लॉकडाऊनच्या काळातही जेट, हेलिकॉप्टर्स बुक करणाऱ्या, ते परवडू शकणाऱ्या मंडळींच्या ओळखी किती वरपर्यंत असू शकतात, याची पोलिसांनादेखील कल्पना होती. मात्र तरीही त्यांनी कायदेशीर कारवाई सुरू केली.हेलिकॉप्टर्सच्या वैमानिकांनंतर पोलीस पुन्हा जेटकडे आले. जेटमधल्या श्रीमंतांच्या श्रीमंतीकडे आणि त्यांच्या 'अर्थ'पूर्ण संवादाकडे दुर्लक्ष करत त्यांनी थेट घरवापसीचे आदेश दिले. शिवाय जेटच्या वैमानिकालाही जबर दंड ठोठावला. इथं येण्यासाठी आवश्यक कोणतंही महत्त्वाचं किंवा आपत्कालीन कारण तुमच्यासाठी नाही. त्यामुळे माघारी फिरा, अशा स्पष्ट सूचना देण्यात आल्या. त्यामुळे एस्कॉर्टसोबत व्हिलावर राहण्याची स्वप्नं पाहात आलेल्या सगळ्यांना आल्या पावलीच (जेटनं) माघारी फिरावं लागेल. विशेष म्हणजे हे सगळं सुरू असताना पोलिसांनी जेटमधल्या एकालाही फ्रान्सच्या जमिनीवर पाऊल ठेवू दिलं नाही.

खरंतर जेटच्या वैमानिकाला दंड झाल्यानंतरच अतिश्रीमंत मंडळी चवताळली होती. हे कोण कुठले पोलीस आम्हाला परत पाठवतात म्हणजे काय, माहिती नाही का आम्ही कोण आहोत, आमच्या ओळखी कुठपर्यंत आहेत, असा संताप त्यांनी व्यक्त केला. मात्र याचा काडीमात्र उपयोग झाला नाही. लंडनहून आलेलं जेट त्यांना तसंच माघारी फिरवावं लागलं.

---------------------------

परदेशातले कायदे अतिशय कठोर असतात. कायद्यासमोर सगळे समान असतात. पण काही जण जरा जास्तच समान असतात, या जॉर्ज ऑर्वेलच्या जगविख्यात वाक्याची प्रचिती तिथे परदेशात (अर्थात चांगल्या यंत्रणांसाठी ओळखल्या जाणाऱ्या देशांमध्ये) सहसा येत नाही. लॉकडाऊनच्या काळातही तेच दिसलं. आपल्या आणि त्यांच्या यंत्रणेत हाच फरक आहे. यंत्रणा उत्तम असलेले देश जगात नावाजले जातात, हे अनेकांनी अनुभवलं असेल. देशाचं मोठेपण हे तिथल्या यंत्रणेत दडलेलं असतं ते असं.

-------------------

लॉकडाऊन काळात वाधवान यांना 'स्पेशल ट्रिटमेंट' देऊन महाराष्ट्र शासनाने मोठा गुन्हाच केला आहे. त्याची कठोर शिक्षा सर्व संबंधितांना मिळायला हवी. मार्सेमधील पोलिसांसारखी हिंमत आपले गृहमंत्री, मुख्यमंत्री, केंद्र सरकार (अमिताभ गुप्ता आयपीएस आहेत) दाखवणार का? कोरोनाच्या लढाईत आपण सगळे एकत्र आहोत, असं म्हणणारे, सगळे एकसमान आहेत आणि सगळ्यांना सारखाच न्याय, हेही सिद्ध करणार का?. पाहूया!