सध्याच्या युगात Artificial Intelligence म्हणजे एआय वेगाने पुढे येत आहे. त्यात न्यूझीलंडमध्ये महिला खासदार लॉरा मॅक्लर यांनी संसदेत स्वत:चा AI जनरेटेड न्यूड फोटो दाखवला. असे बनावट फोटो बनवणे किती सोपे आणि धोकादायक ठरू शकते हे त्यांनी उपस्थितांना सांगत हा फोटो गुगल सर्चद्वारे वेबसाईटचा वापर करून काहीच मिनिटांत डिपफेक बनवला असून डिपफेक आणि AI ला नियंत्रित करण्यासाठी कायदा आणण्याची मागणी त्यांनी केली.
संसदेत लॉरा मॅक्लर म्हणाल्या की, हा माझा न्यूड फोटो आहे, परंतु तो खरा नाही. मला हा डिपफेक फोटो बनवण्यासाठी ५ मिनिटांहून कमी वेळ लागला. समस्या तंत्रज्ञानाची नाही परंतु त्याचा गैरवापर करून लोकांनी त्रास देण्यात आहे. त्यावर आपल्याला तोडगा काढावा लागेल. न्यूझीलंडमध्ये डिपफेकबाबत कुठलाही कायदा नाही परंतु डिजिटल प्रसाराबाबत काही नियम आहेत. लॉरा यांनी डिपफेक डिजिटल हार्म अँन्ड एक्सप्लॉइटेशन विधेयकाचे समर्थन केले. १४ मे रोजी लॉरा यांनी केलेले भाषण सध्या व्हायरल होत आहे.
बहुतांश डिपफेक पॉर्न विना सहमती बनवले जातात. त्याचा बळी महिला पडतात असं न्यूझीलंडमधील तज्ज्ञांनी म्हटलं. कुणीही विना सहमती डिपफेक पॉर्नचे टार्गेट बनू नये. हा उघडपणे छळ आहे. आपल्या कायद्यात लवकरात लवकर सुधारणा करण्याची गरज आहे. डिपफेक बनवण्यासाठी तुम्हाला केवळ एका बॉक्समध्ये क्लिक करण्यास सांगितले जाते. तुम्ही १८ वर्षावरील आहात, फोटोमधील व्यक्तीची सहमती तुमच्याकडे आहे का हेच विचारले जाते. अनेक प्रकरणात सहमती घेतली जात नाही. ९० टक्के महिलांच्या फोटोचा चुकीचा वापर केला जातो असंही लॉरा यांनी संसदेत सांगितले.
दरम्यान, अमेरिकेचे राष्ट्राध्यक्ष डोनाल्ड ट्रम्प यांनी मे महिन्यात टेक इट डाउन कायद्यावर स्वाक्षरी केली, ज्यामुळे एखाद्या व्यक्तीच्या संमतीशिवाय त्याचा फोटो वापरणे गुन्हा ठरेल. या नियमानुसार, पीडितेच्या विनंतीनुसार सोशल मीडिया प्लॅटफॉर्मना ४८ तासांच्या आत असे फोटो काढून टाकावे लागतील. भारतातही नोव्हेंबर २०२४ मध्ये अभिनेत्री रश्मिका मंदाना डिपफेक व्हिडिओचा शिकार झाली होती. रश्मिकाचा फेक व्हिडिओ सोशल मीडियात बराच व्हायरल झाला होता.