हिंगोली - स्वतःच्याच श्रद्धांजलीचे स्टेटस ठेवत एका २८ वर्षीय युवकाने गळफास घेत आत्महत्या केली. ही घटना सेनगाव परिसरातील साई मंदिर परिसरात २७ नोव्हेंबर रोजी सकाळी ६.३० च्या सुमारास उघडकीस आली. वडिलांच्या नावे असलेले कर्ज कसे फेडायचे? या चिंतेतून युवकाने हे टोकाचे पाऊल उचलले.
नवल जयराम नायकवाल (रा. कारेगांव ता. सेनगाव) असे आत्महत्या केलेल्या युवकाचे नाव आहे. सेनगाव तालुक्यातील कारेगाव येथील जयराम नायकवाल यांना कारेगाव शिवारात शेती आहे. पेरणीसाठी वडिलांनी कर्ज घेतले होते. मात्र अतिवृष्टी व सततच्या पावसामुळे पिकांचे मोठे नुकसान झाले. त्यामुळे घेतलेले कर्ज कसे फेडायचे? याची चिंता युवकास होती.
२६ नोव्हेंबर रोजी नवल नायकवाल हा युवक घराबाहेर पडला. रविवारी सकाळी सेनगाव येथील साई मंदिराच्या मागे असलेल्या बाभळीच्या झाडाला नवलचा गळफास घेतलेल्या स्थितीत मृतदेह आढळून आला. घटनेची माहिती मिळताच सेनगाव पोलिस ठाण्याचे निरीक्षक रणजित भोईटे यांच्या पथकाने घटनास्थळी धाव घेऊन पाहणी केली. या प्रकरणी जयराम सूर्यभान नायकवाल यांच्या माहितीवरून सेनगाव पोलीस ठाण्यात अकस्मात मृत्यूची नोंद घेण्यात आली. पोलीस नाईक चव्हाण तपास करीत आहेत.
स्टेटसवर ठेवले होते भावपूर्ण श्रृद्धांजली
घराबाहेर पडताना नवल यांनी स्वतःच्या स्टेटसवर भावपूर्ण श्रध्दांजली नवल असा मजकूर ठेवला होता. मात्र हा प्रकार लवकर कोणाच्या लक्षात आला नाही.