हिंगोली : काळ्या बाजारात विक्रीसाठी जाणारा स्वस्त धान्य दुकानातील ३४१ क्विंटल गहू स्थानिक गुन्हे शाखेच्या पथकाने पकडला. ही कारवाई हिंगोली शहरालगत लिंबाळा एमआयडीसी परिसरात ४ फेब्रुवारी रोजी करण्यात आली. याप्रकरणी ट्रकसह एकूण २७ लाख ३ हजार ५९३ रुपयांचा मुद्देमाल जप्त करण्यात आला असून ग्रामीण पोलीस ठाण्यात तिघांविरूद्ध गुन्हा नोंद झाला आहे.
हिंगोली ते औंढा नागनाथ रोडवरील लिंबाळा एमआययडीसी येथे काळ्या बाजारात जाणारा गहू येत असल्याची माहिती स्थानिक गुन्हे शाखेच्या पथकाला मिळाली. यावरून स्थानिक गुन्हे शाखेच्या पथकाने ४ फेब्रुवारी रोजी या मार्गावरून जाणाऱ्या ट्रक (क्र. एम.एच. २६ बीई २९३५) या वाहनास थांबवून चालकाची विचारपूस केली. यावेळी ट्रकमध्ये ३४१ क्विंटल ५५ किलो वजनाचे गव्हाचे ३४० पोती आढळून आले. आणखी चौकशी केली असता हा गहू मंगरूळपीर (जि. वाशिम) येथून आणल्याचे चालकाने सांगितले. मालाच्या पावत्याची पाहणी केली असता गहू व पावत्याबाबत पोलिसांना संशय आला. त्यामुळे ट्रक ग्रामीण पोलीस ठाण्यात आणून लावण्यात आला. तसेच पोलीस उपनिरीक्षक के.डी. पोटे यांच्या नेतृत्वाखाली पथक तयार करून चौकशीसाठी मंगरूळपीर येथे पाठविण्यात आले. तेथे कृषी उत्पन्न बाजार समितीच्या सचिवांना पावत्या दाखविल्या असता त्या पावत्या बनावट असल्याचे समजले. सदरचा गहू हा स्वस्त धान्य दुकानातील असल्याचेही चौकशीत समोर आले. गहू व ट्रक ताब्यात घेतला असून याप्रकरणी पोलीस उपनिरीक्षक के. डी. पोटे यांच्या फिर्यादीवरून किशन नागोराव धुळगुंडे (रा. पोलीसवाडी ता. लोहा), विनोद ऊर्फ रवि जाधव व त्याचा मुनिम अशा तिघांविरूद्ध हिंगोली ग्रामीण पोलीस ठाण्यात गुन्हा नोंद झाला आहे. तपास पोलीस निरीक्षक उदय खंडेराय करीत आहेत. ही कारवाई पोलीस अधीक्षक एम. राकेश कलासागर, अतिरिक्त पोलीस अधीक्षक यशवंत काळे, पोलीस निरीक्षक उदय खंडेराय यांच्या मार्गदर्शनाखाली पोलीस उपनिरीक्षक किशोर पोटे, विलास सोनवणे, बालाजी बोके, संभाजी लेकुळे, सुनील अंभोरे, राजू ठाकूर, ज्ञानेश्वर सावळे, किशोर सावंत, दीपक पाटील आदींच्या पथकाने केली.
फोटो फाईल ०६एचएनएलपी२०