आडगाव रंजे : वसमत तालुक्यातील दारेफळ शिवारामध्ये झन्नमन्ना नावाचा जुगार सुरू असल्याची माहिती मिळाल्यावरून हट्टा पोलिसांंनी २९ जानेवारी रोजी छापा मारला, यावेळी सात जुगाऱ्यांना अटक करण्यात आली असून, त्यांच्याकडून तीन मोटारसायकली, तीन मोबाइलसह लाखो रुपयांचा ऐवज जप्त करण्यात आला आहे.
वसमत तालुक्यातील दारेफळ शिवारात एका ठिकाणी जुगार सुरू असल्याची माहिती पोलिसांना मिळाली होती. पोलीस पथकाने या ठिकाणी रात्रीच्या सुमारास छापा टाकला असता सात जण जुगार खेळत असल्याचे आढळून आले. या छाप्यात नगदी २१ हजार ४४० रुपये, जुगाराचे साहित्य, तीन मोटारसायकली व तीन मोबाइल असा एकूण २ लाख ४ हजार ४८० रुपयांचा ऐवज पोलिसांनी जप्त केला आहे. याबाबत पोलीस उपनिरीक्षक आकाश सरोदे यांनी पोलिसांत फिर्याद दिली. राजकुमार बबनराव रामपूरकर (रा. दर्गा रोड, परभणी), भगवान रामराव चव्हाण, वैजनाथ श्रीपतराव शेळके, गजानन विठ्ठलराव चव्हाण (तिघे, रा. आडगाव रंजे), सिद्धांत बापूराव एंगडे ( रा. मातोश्रीनगर, परभणी), ज्ञानेश्वर माधवराव चव्हाण (रा. दारेफळ), शेख सलीम शेख छोटेमिया ( रा. हट्टा ) यांच्याविरुद्ध गुन्हा दाखल करण्यात आला आहे. ही कारवाई सपोनि गजानन मोरे, पोलीस उपनिरीक्षक आकाश सरोदे, इम्रान कादरी, अरविंद गजभार, जीवन गवारे, महेश गर्जे, गणेश लेकुळे, महेश अवचार, शेख मदार, चालक लाखाडे यांच्या पथकाने केली.