कळमनुरी : तालुक्यातील ९० ग्रामपंचायतींसाठी १५ जानेवारी रोजी मतदान होऊन १८ जानेवारी रोजी तहसील कार्यालयात मतमोजणी झाली. तालुक्यातील काही मतदारांनी उमेदवारांना डावलत नोटाला पसंती दिली. एकूण मतदानाच्या ४.११ टक्के मतदान नोटाला पडले आहे.
तालुक्यात २७५ मतदान केंद्रे होती. ६१५ जागांसाठी १३६० उमेदवार निवडणूक रिंगणात होते. ५० हजार ६०४ पुरुष व ४४ हजार ६८६ महिला, असे एकूण ९५ हजार २९० मतदारांनी मतदानाचा हक्क बजावला. तालुक्यात आखाडा बाळापूर, शेवाळा, डोंगरकडा आदी गावांच्या ग्रामपंचायती मोठ्या आहेत. जामगव्हाण येथील प्रभाग २ मध्ये नोटाला सर्वाधिक ७७ व ३६ मते पडली आहेत. सांडसतर्फे नांदापूर येथे प्रभाग २ मधून नोटाला २३ मते पडली आहेत. कडपदेव येथेही प्रभाग २ मध्ये २४ व २५ नोटाला पडली आहेत. खरवड येथे प्रभाग एकमध्ये नोटाला २१ मते, सालेगाव येथील प्रभाग एकमध्ये ५९ मते, साळवा येथे प्रभाग ३ मध्ये १५, नांदापूर येथे प्रभाग १ मध्ये १८, प्रभाग ३ मध्ये १६, आखाडा बाळापूर येथे प्रभाग १ मध्ये १९ व २१, प्रभाग २ मध्ये १६ व १९, प्रभाग ४ मध्ये २८, २९, प्रभाग ५ मध्ये १७ व २७, प्रभाग ६ मध्ये १८ व १९, शेवाळा येथे प्रभाग ५ मध्ये १८, वडगावतर्फे जवळा येथे प्रभाग १ मध्ये ७७ मते नोटाला मिळाली आहेत.
येहळेगाव (तु.) येथे प्रभाग २ मध्ये २४, तर प्रभाग ४ मध्ये २०, डोंगरकडा येथे प्रभाग १ मध्ये २०, प्रभाग २ मध्ये १२ प्रभाग ४ मध्ये १५ व १९, वडगावतर्फे जवळा येथे प्रभाग १ मध्ये ७७, असे नोटाला मतदान पडले. काही जण कोणताही उमेदवार नको म्हणून नोटाला पसंती देतात, तर अनेक जणांना मतदान कसे करावे हे समजत नसल्यामुळे अचानक त्यांची बोटे मतदान करताना त्या नोटाच्या बटनकडे जातात. ग्रामपंचायतची मतदान प्रक्रिया ही किचकट आहे. त्यामुळे मतदान कोणाला करावे हेही काही मतदारांना समजत नाही व एका प्रभागामध्ये तीनपेक्षा जास्त उमेदवार असल्याने बटन कोणत्या उमेदवारांसमोरचे दाबावे हे समजत नाही, तसेच अनेक जण मतदान करीत असताना ईव्हीएम मशीनजवळ गेल्यानंतर त्यांची बोटे थरथर कापतात, त्यामुळे उमेदवारासमोरील बटणाऐवजी खाली नोटाचे बटण दाबले जाते, त्यामुळेही या ग्रामपंचायतच्या निवडणुकीत नोटाला जास्त मते पडली आहेत. तालुक्यातील ९० ग्रामपंचायतींमधून नोटाला ३७११ मते पडल्याची माहिती नायब तहसीलदार प्रवीण ऋषी यांनी दिली.