वसमत (हिंगाेली) : मुलगी व जावयाच्या भेटीला आलेल्या अपंग सासऱ्याला जावयानेच डोक्यात लाकडी दांड्याने मारून ठार मारल्याची घटना सोमवारी घडली. वसमत येथील लिटल इंग्लिश स्कूलच्या इमारतमधील वॉचमनच्या खोलीत ही घटना घडली आहे.
वसमत येथील लिटल इंग्लिश स्कूलमधील वॉचमन असलेल्या काशीनाथ साहेबराव चौरे यांच्याकडे त्यांचा सासरा पंडितराव विठ्ठल पानधोंडे (वय ६५, रा. पळसगाव) भेटीसाठी आले होते. सासरा-जावयामध्ये काहीतरी वाद झाला. प्रकरण हातघाईवर आले. यात जावयाने सासऱ्याच्या डोक्यात दंडुक्याने मारून त्यांचा जीव घेतला. या घटनेने खळबळ उडाली. घटनेतील मयत पंडितराव पानधोंडे हे अपंग होते. या घटनेचे वृत्त शहर पोलिसांना समजताच पोलीस निरीक्षक शिवाजी गुरमे, सपोनि श्रीदेवी पाटील, सपोनि पंढरीनाथ बोधनपोड, पोलीस उपनिरीक्षक प्रकाश आवडे, गजानन बरगे व पोलीस घटनास्थळी धावले.
आरोपी जावई काशीनाथ चौरे यास पाेलिसांनी ताब्यात घेतले. याप्रकरणी लिटल इंग्लिश स्कूलचे संचालक नामदेव दळवी यांनी वसमत पोलिसात तक्रार दिली. या तक्रारीवरून काशीनाथ चौरे विरोधात खुनाचा गुन्हा नोंदविण्यात आला आहे. शाळेत वाॅचमन असलेला जावई व सासरा यांच्यात नेहमी वादावादी हाेत असे. वादावादी कोणत्या कारणावरून व्हायची, याचे कारण समजले तर खुनामागचे नेमके कारण स्पष्ट होऊ शकते. खून प्रकरणात एकटा जावईच आहे की अन्य कुणाचा सहभाग आहे, हे पोलीस तपासात स्पष्ट होणार आहे. या प्रकरणाचा तपास सपोनि श्रीदेवी पाटील करीत आहेत.