सेनगाव : येथील तहसील कार्यालयात मागील वर्षभरापासून नवीन रेशन कार्ड मिळत नसल्याने लाभार्थी त्रस्त झाले आहेत. अनेकांना रेशन कार्ड नसल्याने शासनाच्या आरोग्य सुविधेसह अन्य योजनेचा लाभ घेताना अडचण निर्माण हाेत आहे. यामुळे नवीन रेशन कार्ड वाटपातील अनियमितता दिसून येत आहे.
सेनगाव तालुक्यात रेशन कार्ड वाटपातील अनियमितता अनेक वर्षांपासून कायम आहे. आज स्थितीला तहसीलच्या पुरवठा विभागात नवीन रेशन कार्ड पहायला मिळत नसताना, बाहेरून आलेल्या नवीन रेशन कार्डला नोंदणीकृंत करण्याचे सोपे काम करून लाभार्थ्यांची वेळ मारून नेली जात आहे. पूर्वी येथील तहसील कार्यालयाला प्राप्त नवीन रेशन कार्डचे वाटप नियमांनुसार, गरजवंत किवा गहाळ झालेल्या लाभार्थ्यांना नवीन कार्ड वाटप केले नाही. त्यामुळे आज स्थितीला या विना रेशन कार्डधारक कुटुंबासमोर मोठी अडचण निर्माण झाली आहे. रेशन कार्ड गहाळ झालेले किवा विभक्त कुटुंब झालेले अनेक लाभार्थी नवीन कार्ड बनविण्यासाठी रितसर तहसील कार्यालयात मागणी अर्ज देऊन नियमांनुसार शुल्क भरणा करायला तयार असतानाही वर्षापासून तहसील पुरवठा विभागात नकाराशिवाय त्यांना काही मिळत नाही. अनेक गोरगरीब कुटुंबातील सदस्यांना केवळ रेशन कार्ड नसल्याने शासनाच्या मोफत आरोग्य उपचार सुविधेचा लाभ मिळत नाही. असे असताना तहसील कार्यालय, पुरवठा विभाग याबद्दल बेफिकीर आहे.
मागील वर्षभरापासून नवीन रेशन कार्ड नाही. पुरवठा विभागाने पंडीत दीनदयाळ योजनेच्या माध्यमातून नवीन ४ हजार ५०० रेशन कार्डची मागणी गतवर्षी माहे जानेवारीमध्ये केली असल्याचे जुनेच रडगाणे सांगितले जात आहे. परंतु वरिष्ठांनी याकडे गांभीर्याने लक्ष दिले नाही. तालुक्यात नवीन रेशन कार्डची मागणी आता तीव्र झाली आहे. पूर्वी आलेल्या नवीन रेशन कार्डचे तहसील, रास्त भाव दुकानदार यांनी व्यवस्थितरित्या वाटप केले नाही. त्याचे वाटप कधी आणि कुणाला केले गेेेलेे याचा शोध आजपर्यंत लागला नाही. यापूर्वी तहसीलला प्राप्त नवीन रेशन कार्ड कुणाला वाटप झाले. किती रास्त भाव दुकानदारांनी लाभार्थ्यांपर्यत पोहचविले याची सविस्तर तपासणी करण्याची गरज आहे. नवीन रेशन कार्डबद्दल निर्णय घेऊन मागणी करणाऱ्यांना विनाअडथळा रेशन कार्ड वाटप करण्याची आता गरज आहे.
आमच्याकडे रेशन कार्ड नाहीत : पुरवठा विभाग
येथील पुरवठा विभागातील अव्वल कारकून कारघुडे यांनी नवीन रेशन कार्ड वर्षभरापासून नसल्याचे सांगितले. आम्ही साडेचार हजार नवीन रेशन कार्ड मागणी केली आहे. आमच्याकडे आता एकही नवीन रेशन कार्ड नसल्याने आम्ही नवीन कार्ड मागणी असूनही मिळाले नसल्याचे त्यांनी सांगितले.