कुरुंदा (जि. हिंगोली) : लग्न झाल्यापासून विविध कारणांनी पत्नीसोबत वाद घालून रागाच्याभरात चक्क पत्नीला पेटवून खून केल्याची घटना हिंगोली जिल्ह्यातील पांगारा शिंदे येथे घडली. मयताला दोन महिन्यांची चिमुकली मुलगी असून, ही घटना २१ जानेवारी रोजी घडली. या प्रकरणातील आरोपीला कुरुंदा पोलिसांनी ताब्यात घेतले आहे.
पांगारा शिंदे येथील मयत संगीता रामा मारकळ यांचा विवाह तीन वर्षाआधी झाला होता. लग्नानंतर काही चांगला संसार चालल्यानंतर ‘तू दिसायला चांगली नाहीस, तुला स्वयंपाक येत नाही,’ असे म्हणून सतत मारहाण करीत त्रास नवरा देत होता. विविध कारणाने सतत नवरा बायकोमध्ये वाद व्हायचे. त्यामुळे रागाच्या भरात ‘मी तुझा काटाच काढतो’ असे म्हणून २१ जानेवारी रोजी मयताच्या पतीने कोणत्या तरी निमित्ताने पांगारा शिंदे गावाबाहेरील बोल्डा नाल्यात घेऊन गेला. मयत संगीता मारकळ यास मारहाण करून अंगावर काहीतरी टाकून पेटवून दिले. जळून तिचा जाग्यावरच मृत्यू झाल्याची घटना घडली.
नवरा-बायकोच्या भांडणातून पतीने पत्नीस पेटवून खून केल्याचा प्रकार घडला असून, याप्रकरणी २२ जानेवारी रोजी कुरूंदा पोलीस ठाण्यात गुन्हा दाखल करण्यात आला आहे. मयताला दोन मुली असून, एक मुलगी दोन महिन्यांची चिमुकली आहे. दूध पिणाऱ्या त्या चिमुकलीची मायेची सावली बापामुळे हरवली आहे. मोलमजुरी करून उपजीविका चालविल्या जाते. या घटनेमुळे पांगारा शिंदे येथे हळहळ व्यक्त होत आहे.
फिर्यादी नानाराव भुरके यांच्या फिर्यादीवरून आरोपी रामा मारकळ याच्याविरुद्ध कुरुंदा पोलीस ठाण्यात गुन्हा दाखल करण्यात आला आहे. आरोपीला पोलिसांनी ताब्यात घेतले असून, घटनास्थळी सपोनि सुनील गोपीनवार, फोजदार सविता बोधणकर, पो. नायक गजानन भोपे यांनी भेट दिली.