सर्व शासकीय, निमशासकीय कर्मचाऱ्यांना हेल्मेटसक्ती

मोटार वाहन अधिनियम- १९८८ च्या कलम १२९ मध्ये नमूद केल्यानुसार कोणतेही दोनचाकी वाहन रस्त्यावर चालविताना हेल्मेट परिधान करणे सक्तीचे आहे. तसेच वेळोवेळी उच्च न्यायालय, मा. सर्वोच्च न्यायालय यांनीदेखील दुचाकी वाहन चालवताना हेल्मेट घालणे हे सक्तीचे असल्याचा निर्णय दिला आहे. त्यामुळे जिल्हाधिकारी व जिल्हादंडाधिकारी तथा जिल्हा रस्ता सुरक्षा समितीचे अध्यक्ष रुचेश जयवंशी यांनी हिंगोली जिल्ह्यातील सर्व शासकीय, निमशासकीय, महामंडळे, नगरपालिका, नगर परिषद व सर्व शासकीय यंत्रणा यांच्या कार्यालयात काम करणाऱ्या अधिकारी व कर्मचारी जे दुचाकी वाहनाचा वापर करतात त्यांना हेल्मेट परिधान करणे सक्तीचे केले आहे. दुचाकी वाहन वापरताना हेल्मेट घातलेले नसल्यास तो अधिकारी व कर्मचारी हा मोटार वाहन अधिनियमाच्या तरतुदीनुसार शिक्षेस पात्र राहील, असेही आदेशात नमूद केले आहे. हिंगोली शहर व जिल्ह्यांतर्गत येणाऱ्या सर्व शासकीय, निमशासकीय, महामंडळे, नगरपालिका, नगर परिषद व सर्व शासकीय यंत्रणा यांच्या कार्यालयात काम करणाऱ्या अधिकारी व कर्मचाऱ्यांना हे आदेश १ फेब्रुवारी २०२१ पासून लागू करण्यात आले आहेत.