सेनगाव: येथील तहसील कार्यालयात मागील वर्षभरापासून नवीन रेशन कार्ड मिळत नसल्याने लाभार्थी त्रस्त झाले असून, अनेकांना रेशन कार्ड नसल्याने शासनाच्या आरोग्य उपचार सुविधांसह अन्य योजनांचा लाभ घेताना अडचण निर्माण होत आहेत.
तालुक्यात रेशन कार्ड वाटपातील अनियमितता अनेक वर्षांपासून कायम आहे. सद्य:स्थितीला तहसीलचा पुरवठा विभागात नवीन रेशन कार्ड पाहायला मिळत नसताना बाहेरून आलेल्या नवीन रेशन कार्डला नोंदणीकृत करण्याचे सोपे काम करून, लाभार्थ्यांची वेळ मारून नेत आहे. पूर्वी येथील तहसील कार्यालयाला प्राप्त नवीन रेशन कार्डचे वाटप नियमानुसार, गरजवंत किंवा गहाळ झालेल्या लाभार्थ्यांना नवीन कार्ड वाटप केले नाही. त्यामुळे आजमितीस रेशन कार्डधारक कुटुंबासमोर मोठी अडचण निर्माण झाली आहे. तहसील कार्यालयात रेशन कार्ड गहाळ झालेले किंवा विभक्त कुटुंब झालेले अनेक लाभार्थी नवीन रेशन कार्ड बनविण्यासाठी रीतसर मागणी अर्ज देऊन नियमानुसार शुल्क भरणा करायला तयार आहेत, परंतु तहसीलच्या पुरवठा विभागात चकरा मारूनही ते मिळत नाही.
अनेक गोरगरीब कुटुंबातील सदस्यांना रेशन कार्ड नसल्याने शासनाच्या मोफत आरोग्य उपचार सुविधांचा लाभ मिळत नाही. असे असताना तहसील कार्यालय, पुरवठा विभाग याबद्दल बेफिकीर आहे. मागील वर्षभरापासून नवीन रेशन कार्ड नाही. पुरवठा विभागाने पंडित दिनदयाळ योजनेचा माध्यमातून नवीन ४ हजार ५०० रेशन कार्डची मागणी गतवर्षी जानेवारीमध्ये केली असल्याचे सांगितले जात आहे.
तालुक्यात नवीन रेशन कार्डची मागणी होऊ लागली आहे. पूर्वी झालेल्या नवीन रेशन कार्डचे तहसील, रास्त भाव दुकानदारांनी व्यवस्थितरीत्या वाटप केले नाही. यापूर्वी तहसीलला प्राप्त नवीन रेशन कार्ड कुणाला वाटप झाले, किती रास्त भाव दुकानदारानी लाभार्थ्यांपर्यंत पोहोचविले, याची तपासणी करण्याची गरज आहे. नवीन रेशन कार्डबद्दल निर्णय घेऊन मागणी करणाऱ्यांना विनाअडथळा रेशन कार्ड वाटप करण्याची गरज आहे.
प्रतिक्रिया
आमच्याकडे रेशन कार्ड नाहीत
येथील पुरवठा विभागातील अव्वल कारकून कारघुडे यांनी नवीन रेशन कार्ड वर्षभरापासून नसल्याचे सांगितले. आम्ही साडेचार हजार नवीन रेशन कार्ड मागणी केली आहे. आमच्याकडे आता एकही नवीन रेशन कार्ड नसल्याने, आम्ही नवीन रेशन कार्ड मागणी असूनही देऊ शकत नसल्याचे सांगितले.