जिल्हा बाल संरक्षण कक्षाने रोखला बालविवाह

येळी येथे एका अल्पवयीन मुलीचा विवाह लावून दिला जात असल्याची माहिती चाईल्ड लाईनला मिळाली होती. त्यावरून जिल्हा महिला व बालविकास अधिकारी विठ्ठल शिंदे, जिल्हा महिला बाल संरक्षण अधिकारी सरस्वती कोरडे यांच्या सूचनेवरून बाल संरक्षण कक्षातील पथकाने येळी येथे धाव घेतली. तेथे पोहचल्यानंतर कायदा व परीविक्षा अधिकारी ॲड. अनुराधा पंडित, सामाजिक कार्यकर्ता रामप्रसाद मुंडे, बाह्य क्षेत्र कार्यकर्ता अनिरुद्ध घनसावंत, चाईल्ड लाईनचे केंद्र समन्वयक संदीप कोल्हे, स्वप्निल दीपके यांनी मुलीसह तिच्या आई-वडिलांची भेट घेतली. बालविवाह कायद्याने गुन्हा आहे. तसेच एक लाख रुपये दंड व दोन वर्ष सक्तमजुरीची शिक्षा किंवा दोन्ही होऊ शकतात याची माहिती देत समुपदेशन करण्यात आले. त्यानंतर आई-वडिलांचा जबाब लिहून घेण्यात आला. यावेळी ग्रामसेवक तथा बालविवाह प्रतिबंधक अधिकारी रविशंकर पाटील, सरपंच सुनीता शिवकुमार कापसे, पोलीसपाटील सदाशिव लिंबाळकर, अंगणवाडी ताई अनसूयाबाई वाकळे आदींची उपस्थिती होती.