वाळूची अवैधपणे वाहतूक करणारे दोन ट्रॅक्टर पकडले

गत कित्येक दिवसांपासून अवैध वाळूचे ट्रॅक्टर बिनधास्त भरधाव वेगाने पळवून वाहतूक करणाऱ्या ट्रॅक्टरवर महसूल विभागाचा डोळा होता. परंतु, ते हाती लागत नव्हते. ६ जानेवारी रोजी रात्री आठ वाजण्याच्या सुमारास शिरडशहापूर येथे वाळूची अवैधपणे वाहतूक करणारे दोन ट्रॅक्टर पकडले. पूर्णा नदीच्या नालेगाव परिसरातून शिरडशहापूर व परिसरात अवैधरित्या वाळूचे उत्खनन सुरू होते. याबाबत ‘लोकमत’ मध्ये वृत्त प्रकाशित करताच महसूल विभागाच्या अधिकाऱ्यांनी शिरडशहापूर येथे दोन ट्रॅक्टर पकडले. याबाबतची माहिती तहसीलदार कृष्ण कानगुले, नायब तहसीलदार सचिन जोशी यांच्या मार्गदर्शनाखाली पथकाने शिरडशहापूर येथे अवैधरित्या वाहतूक करणारे दोन ट्रॅक्टर पकडले. दोन्ही ट्रॅक्टरला क्रमांक नाही. ट्रॅक्टर मालक विश्वनाथ संभाजी कदम (रा.वाई) गोविंद शिवजी राखोंडे (रा.नालेगाव) या दोघांविरुद्ध कारवाई करुन दोन्ही ट्रॅक्टर औंढा येथील पोलीस ठाण्यात जमा करण्यात आले आहे. पुढील कारवाई सुरु असल्याचे महसूल विभागाच्या वतीने सांगण्यात आले. ही कारवाई तहसीलदार कृष्ण कानगुले, सचिन जोशी यांच्या मार्गदर्शनाखाली मंडळ अधिकारी राऊत, घुगे ,तलाठी मूकिर काकडे ,हरण आदींनी केली.