मुंबई : 'कोव्हिड19 : शिकलेले धडे आणि भविष्याचे नियोजन' या चर्चासत्रामध्ये डेल्टा प्लस कोव्हिड19 व्हेरिअंट (Corona Delta plus varient) ही चिंतेची बाब असल्याचे आणि लवकरात लवकर लस घेणे हेच आपले शस्त्र असल्याचे मत न्यूबर्ग डायग्नॉस्टिक्स पॅनलमध्ये व्यक्त करण्यात आले. तातडीने लस घेतल्यामुळे आपण सामुहिक प्रतिकारकशक्ती विकसित करू शकू आणि काळी बुरशी (Black Fungus), आरोग्याची गंभीर गुंतागुंत, साइड इफेक्ट्स, रक्ताच्या गुठळ्या तसेच उपचारांदरम्यान व नंतर होणारे संसर्ग कमी करता येतील. चर्चासत्रात सहभागी झालेल्या तज्ज्ञांनुसार आपण या संदर्भात काळजी घेतली नाही तर तिसरी लाट येईल, हे स्पष्ट आहे आणि ती ऑगस्टमध्ये सुरू होऊन नोव्हेंबर महिन्यात तीव्र स्वरुप धारण करेल, अशी चिंता तज्ज्ञांनी व्यक्त केली. (Corona Vaccination may reduce of mucormycosis after corona infection.)
चेन्नईमधील मद्रास ईएनटी रिसर्च फाउंडेशनचे संस्थापक, ओटोऱ्हायनोलॅरिंगो लॉजिस्ट प्राध्यापक आणि पद्मश्री पुरस्कार विजेते डॉ. मोहन कामेश्वरन म्हणाले, "मार्च महिन्यात आपल्याला म्युकरमायकोसिसचा (mucormycosis) (काळी बुरशी - गंभीर व दुर्मीळ स्वरुपाचा बुरशीचा संसर्ग) रुग्ण पहिल्यांदा दिसून आला. मार्चमध्ये या प्रकाराचे 2 ते 3 रुग्ण होते, ते मे महिन्यात 10 ते 15 झाले आणि हा आजार झालेल्या व्यक्तींमधील मृत्यूदर 40 ते 50 टक्के आहे. हा दर खूप जास्त असला तरी जेवढा असण्याची अपेक्षा केली जात होती, तेवढा हा दर नाही. म्युकरमायकोसिसवर उपचार करण्यासाठी संबंधित औषधांची कमतरता ही प्रमुख समस्या आहे. तामिळनाडूमध्ये म्युकरमायकोसिसचा फैलाव महामारीच्या दरम्यान झाला."
"काळी बुरशी झालेल्या माझ्याकडे आलेल्या 60 ते 70 टक्के व्यक्तींनी लस घेतली नव्हती. 25-30 टक्के व्यक्तींनी लस घेतली होती आणि 5 टक्क्यांहून कमी व्यक्तींनी दोन्ही डोस घेतले होते. म्हणजेच लसीचे दोन्ही डोस घेतलेल्या व्यक्तींना कोव्हिड-19चा संसर्ग होण्याचे प्रमाण अत्यल्प आहे आणि काळी बुरशीचा संसर्ग होण्याची शक्यताही फार कमी आहे.", असे ते म्हणाले. तिसऱ्या लाटेबद्दल नवी दिल्लीतील बीएलके मॅक्स हॉस्पिटलमधील वरिष्ठ संचालक आणि इंटर्न मेडिसीन विभागाचे प्रमुख डॉ. राजिंदर कुमार सिंगल म्हणाले, "दुसरी लाट अजूनही पूर्णपणे संपलेली नाही आणि तिसरी लाट उंबरठ्यावर येऊन ठेपली आहे. लसीकरण मोठ्या प्रमाणात झाल्यामुळे तिसरी लाट ही दुसऱ्या लाटेच्या तुलनेने सौम्य असेल. भारताच्या सुमारे 21 टक्के लोकसंख्येने पहिला डोस घेतला आहे, 4% लोकसंख्येने दोन्ही डोस घेतले आहेत. पण संसर्गाचा फैलाव रोखण्यासाठी जलद लसीकरण, कोव्हिड-19ला आळा घालण्यासाठीची काळजी आणि मोठ्या प्रमाणावर फैलाव करणारे कार्यक्रम थांबविणे ही या आजाराचा फैलाव थांबविण्याची गुरूकिल्ली आहे."
अहमदाबाद येथील न्यूबर्ग सेंटर ऑफ जिनॉमिक मेडिसीन डॉ. भाविनी शाह म्हणाल्या, "कोव्हिड 19चा दुसरा डोस घेतलेल्या शेकडो व्यक्तींच्या अँटिबॉडी चाचण्या दर्शवितात की, लोकसंख्येसाठी बूस्टर डोस आवश्यक असतील. गुजरातमधील 30,000 लोकांच्या अँटिबॉडींची पातळी तपासल्यावर आम्ही या निष्कर्षापर्यंत पोहोचलो आहोत. यापैकी संशोधकांनी 500 आरोग्यसेवा कर्मचाऱ्यांवर भर दिला होता. रोगप्रतिकारक शक्ती वाढविण्यासाठी दर वर्षी लोकांना फ्लूसारखा बूस्टर डोस घ्यावा लागेल."
मुंबईतील नानावटी मॅक्स सुपर स्पेशालिटी हॉस्पिटलमधील जनरल फिजिशिअन आणि इन्फेक्शन डिसीज स्पेशालिस्ट डॉ. हेमलता अरोरा म्हणाल्या, "लस घेतल्याने तयार होणाऱ्या अँटिबॉडीजमुळे कोव्हिड, गुंतागुंत, साइड इफेक्ट्स, रक्ताच्या गुठळ्या होणे आणि उपचारादरम्यान वा नंतर होणारा संसर्ग यापासून संरक्षण होते, त्यामुळे प्रत्येकाने लस घेणे आवश्यक आहे."
त्या पुढे म्हणाल्या, "पहिल्यांदा आणि दुसऱ्यांदा आपण जी डीएनए लस घेतली, ती न घेता बूस्टर डोससाठी mRNA लसीच्या वापरासंदर्भात अभ्यास सुरू आहे. मिश्रण करणे बहुधा अधिक योग्य राहील, पण त्याचे काही साइड इफेक्ट्स असू शकतात. या संदर्भात भारतात अधिक अभ्यास होणे आवश्यक आहे."