गोंदिया : तिरोडा तालुक्याच्या चुरडी प्रकरणाचा मुख्य सूत्रधार कोण याचा तपास करण्यासाठी पोलिसांना उत्तरीय तपासणी अहवालाची प्रतीक्षा आहे. डॉ. कांचन रहांगडाले यांनी केलेल्या उत्तरीय तपासणीत मालता रेवचंद बिसेन, मुलगा व मुलगी यांचा मृत्यू त्यांच्या डोक्यावर लागलेल्या मारामुळे होऊ शकतो, तर रेवचंद बिसेन यांचा मृत्यू गळफासामुळे होऊ शकतो, असा अभिप्राय दिला आहे. परंतु, त्या मृतदेहांचे चौघांचे व्हिसेरा प्रिझर्व करून नागपूरच्या रासायनिक प्रयोगशाळेत पाठविले आहेत. या प्रयोगशाळेचा अहवाल येईपर्यंत पोलिसांना तपास कोणत्या दिशेने करावा हा प्रश्न पडला आहे.
चुरडी येथील घटना घडल्यावर ठाणेदारांपासून ते जिल्ह्याचे सर्वच बडे अधिकारी येथे ठाण मांडून आहेत. घटनास्थळाची बारकाईने पाहणी केली. या घटनेसंदर्भात तिरोडा ठाणेदाराला सूचना दिल्या आहेत. खैरबोडी येथील अंकुश चामलाटे यांच्या तक्रारीवरून या घटनेसंदर्भात तिरोडा पोलिसांनी भादंविच्या कलम ३०२ अन्वये गुन्हा नोंद केला आहे. घटनेचा तपास ठाणेदार योगेश पारधी करीत आहेत. या प्रकरणाची गुंतागुंत सोडविण्यासाठी आता सायबर सेलही कामाला लागला आहे. सायबर सेलच्या पोलीस निरीक्षक वैशाली पाटील यांचेही पथक या खुनाच्या प्रकरणाचा तपास करीत आहे. या चौघांच्या हत्येपूर्वी त्यांचे मोबाईल कॉल कनेक्शन या घटनेतील आरोपींपर्यंत पोहोचवतील असा विश्वास आहे. मागील महिनाभरात या चारजणांनी कुणाकुणाशी संपर्क केला, त्यांचे झालेले संभाषण, चॅटिंगही या घटनेचा उलगडा करण्याची शक्यता आहे.
............
चौथ्या दिवशी गूढ कायमच
चुरडी येथे एकाच घरी एकाच कुटुंबातील चौघांचे मृतदेह आढळले. ही धक्कादायक घटना मंगळवारी (दि. २१) उघडकीस आली. यात तिघांच्या डोक्यावर लोखंडी अवजड वस्तूने प्रहार करून खून करण्यात आल्याचे उघड झाले. मात्र, चौथा मृतदेह गळफास लागलेल्या स्थितीत आढळल्याने प्रकरणातील गूढ वाढले. यात त्या कुटुंबप्रमुखाची हत्या की आत्महत्या, हे गूढ उकल झाल्यावरच मारेकरी होणार उघड. मारेकरी घरचा की बाहेरचा, हेही ठरणार; पण हत्या की आत्महत्या हा गुंता वाढल्याने प्रकरणातील गूढ चौथ्या दिवशीही कायम आहे.
..........
चुरडीला आले पोलीस छावणीचे स्वरूप
चुरडी येथील घटनेतील गूढ वाढत आहे, तर प्रकरणाचे गांभीर्य लक्षात घेऊन तिरोडा पोलीस, गंगाझरी पोलीस, सीआरपीएफ, पॅरामिलिटरी फोर्स व गोंदिया येथील राखीव पोलिसांच्या तुकड्या तिरोडा शहर व चुरडी येथे तैनात करण्यात आल्या आहेत.
......
सत्यता पुढे येण्यासाठी राजकारणी आक्रमक?
चुरडी हत्याकांडाचा तपास करण्यासाठी पोलीस विभागाने पाच टीम स्थापित केल्या. या पाचही टीमच्या तपास आणि चौकशीत आतापर्यंत काय मिळाले याकडे लक्ष लागले आहे; परंतु आतापर्यंत काय आढळले ते पोलीस माध्यमांना माहिती देण्यास टाळाटाळ करीत आहेत. तपासाचा भाग सांगून निरुत्तर होत आहेत. त्यामुळे आता राजकारणी या प्रकरणाची सत्यता पुढे आणण्यासाठी आक्रमक भूमिका घेणार असल्याची चिन्हे दिसत आहेत.