गोंदिया: उन्हाचा कडाका वाढल्याने स्टोअर रूममधून कुलर बाहेर काढण्यात आले आहे. उकाड्यामुळे घरोघरी कुलरचा वापर वाढला आहे. कुलर काळजीपूर्वक वापरून विजेचे अपघात टाळणे गरजेचे आहे. प्राधान्याने मुलांना कुलरपासून दूर ठेऊन सकर्तता बाळगणे हितावह ठरणारे आहे.
उन्हाळ्यात शॉक लागून जीवितहानी अथवा आग लागल्याने वित्तहानी होते. अपघात टाळण्यासाठी कुलरचा वापर नेहमी थ्री-पीन प्लगवरच करावा. घरात अर्थिंग लिकेज सर्किट बेस बसवून घ्यावे, बाजारात हे उपकरण सहज उपलब्ध आहेत. विजेचा धोका संपताच विजेचा पुरवठा बंद होतो. घरातील अर्थिंग योग्य असल्याची तपासणी करून घेणे आवश्यक आहे. कुलरच्या लोखंडी बाह्य भागात वीजपुरवठा येऊ नये, यासाठी कुलरचा थेट जमिनीसोबत संपर्क येईल, अशी व्यवस्था करावी. पाणी भरताना कुलरचा वीजपुरवठा बंद ठेवावा, कुलरमधील पाणी जमिनीवर पडणार नाही, याची काळजी घ्यावी. ओल्या हाताने कुलरला स्पर्श करू नये. ओल्या हाताने किंवा ओल्या जमिनीवर टिल्लू पंप सुरू करू नये, पंपातून पाणी येत नसेल तर पंपाचा वीज पुरवठा आधी बंद करावा. त्यानंतर प्लग काढल्यानंतर व पंपाला हात लावावा. पंप पाण्यात बुडला नसल्याची खात्री करून घ्यावी. बरेचदा पाण्याची पातळीही खोल गेल्याने पंप सुरू करूनही पाणी खेचले जात नाही. तो पंप एअर लाॅक होतो. अशावेळी प्रायमिंग करणे आवश्यक असते. बरेचदा अज्ञानामुळे चालू पंपाचे प्रायमिंग केले जाते. अशावेळी विजेचा शॉक लागण्याची शक्यता असते. त्यामुळे चालू पंपाचे प्रायमिंग करणे टाळावे, अशा प्रकारे खबरदारी घेणे गरजेचे आहे, असे महावितरण गोंदिया परिमंडळाचे जनसंपर्क अधिकारी अविनाश साखरे यांनी कळविले आहे.