सडक अर्जुनी : भरधाव पिकअप वाहनाने मोटारसायकलला दिलेल्या धडकेत दोन कनिष्ठ विद्यालयीन विद्यार्थी ठार झाले, तर एक विद्यार्थी गंभीर जखमी झाला. बुधवारी सकाळी ७.३० वाजेच्या सुमारास गोंदिया-कोहमारा मार्गावरील खजरीजवळ हा अपघात झाला.
तुषार बीरजलाल शिवणकर (वर्ग ११, रा. मुरदोली) व शुभम नंदकुमार भिमटे (वर्ग ११, रा. मुंढरीटोला) असे अपघातात ठार झालेल्या विद्यार्थ्यांची नावे आहेत. तर प्रवीण संतोष कटरे (रा. डव्वा) असे जखमी झालेल्या विद्यार्थ्याचे नाव आहे.
आदिवासी विकास हायस्कूल खजरी येथील तीन विद्यार्थी मोटारसायकलने विद्यालयात जात असताना कोहमारा ते गोंदिया मार्गाने जात असलेल्या मालवाहक पिकअपने (क्र. एनएच २० सीटी ६०१८) त्यांना धडक दिली. यात तुषार बीरजलाल शिवणकर, रा. मुरदोली व शुभम नंदकुमार भिमटे, रा. मुंढरीटोला या विद्यार्थ्यांचा जागीच मृत्यू झाला, तर प्रवीण संतोष कटरे (रा. डव्वा) हा गंभीर जखमी झाला. त्याला उपचारासाठी गोंदिया येथील सहयोग हॉस्पिटल येथे दाखल करण्यात आले आहे. घटनेची माहिती मिळताच आदिवासी विकास हायस्कूल खजरी येथील शिक्षक व गावकऱ्यांनी धाव घेऊन विद्यार्थ्यांना रुग्णालयात दाखल केले. पिकअप चालक फरार झाला. याप्रकरणी डुग्गीपार पोलिसांनी गुन्हा दाखल केला आहे. अधिक तपास पोलीस उपनिरीक्षक भुरले करीत आहेत.
.......
वाहतूक पोलीस हेल्मेट चेक करण्यात व्यस्त
गोंदिया-काेहमारा मार्गावरील अपघातांच्या संख्येत मागील काही दिवसांपासून प्रचंड वाढ झाली आहे. या मार्गावर सतत वाहनांची वर्दळ राहते. शिवाय अनेक शाळा आणि महाविद्यालये रस्त्यालगत आहेत. मात्र या ठिकाणी वाहतूक शिपाई अथवा ब्रेकर नसल्याने अपघातांची मालिका सुरुच आहे. वाहतूक पोलिसांचे लक्ष सध्या हेल्मेट आणि मास्क न लावणाऱ्याकडेच असून ते गावाच्या सीमेबाहेर तैनात ड्यूटी करुन दंड वसूल करण्यात व्यस्त असल्याचे चित्र आहे.