गोंदिया : मुर्री रेल्वे चौकी येथील येरणे बार येथे २६ फेब्रुवारीच्या रात्री ९ वाजता तिघांनी बार मालकाला मारहाण करून त्याच्या काउंटरमधील १९ हजार रुपये रोख व दारूच्या चार बाटल्या हिसकावून नेल्या होत्या. या प्रकरणात तिघांवर गोंदिया शहर पोलिसांनी गुन्हा दाखल केला होता. या प्रकरणातील आशुतोष डोंगरे (२३) व पंकज पन्नालाल खोब्रागडे (१८, दोन्ही रा. गौतमनगर, गोंदिया) या दोघांना अटक करण्यात आली आहे.
कुणाल हेमंत येरणे हा मुर्री येथील येरणे बारमध्ये काउंटरवर असताना आरोपी संदीप लक्ष्मीकांत चौधरी (२४), आशुतोष डोंगरे (२३) व पंकज पन्नालाल खोब्रागडे (१८, तिन्ही रा. गौतमनगर, गोंदिया) या तिघांनी कुणालला दारू पाज, असे म्हटल्यावर त्यांना दारू पाजण्यास कुणालने नकार दिला होता. त्यावर पंकज खोब्रागडे याने त्यांच्या काउंटरमधील गल्यातून १९ हजार काढले. दोन बॉटल मॅकडॉल नंबर १ व व्हिस्कीच्या दोन बॉटल अशा ४०० रुपये किमतीच्या चार बॉटल हिसकावून घेतल्या. त्यांना कुणालने थांबविण्याचा प्रयत्न केला असता त्याला धक्काबुक्की केली. तिघांवर गोंदिया शहर पोलिसांनी भादंविच्या कलम ३९४, ३२३, ५०६, ३४ अन्वये गुन्हा दाखल केला होता. यापैकी आशुतोष व पंकज या दोघांना साहाय्यक पोलीस निरीक्षक संतोष सपाटे यांनी अटक केली आहे. आरोपी संदीप लक्ष्मीकांत चौधरी (२४, रा. गौतमनगर, गोंदिया) हा फरार आहे.