क्षयरोग अधिकारी आणि कर्मचाऱ्यात हमरीतुमरी

जिल्हा क्षयरोग अधिकाऱ्यांच्या कारभारामुळे गेल्या वर्षभरापासून पदभरती रेंगाळलेली आहे. सदर अधिकारी कर्मचाऱ्यांना वेतन व इतर भत्त्यांपासून सहा-सहा महिन्यापासून वंचित ठेवत आहे.

गोंदिया : जिल्हा क्षयरोग अधिकाऱ्यांच्या कारभारामुळे गेल्या वर्षभरापासून पदभरती रेंगाळलेली आहे. सदर अधिकारी कर्मचाऱ्यांना वेतन व इतर भत्त्यांपासून सहा-सहा महिन्यापासून वंचित ठेवत आहे. याबाबत एका कर्मचाऱ्याने त्यांना विचारपूस केली असता क्षयरोग अधिकाऱ्याने क्रोधात येवून सदर कर्मचाऱ्याला अपमानित केले. यावेळी अधिकारी आणि कर्मचारी यांच्यात झालेल्या हमरीतुमरीनेमुळे सदर कर्मचाऱ्याचा रक्तदाब अत्यंत कमी झाला व त्यांना त्वरित केटीएस रूग्णालयात उपचारासाठी दाखल करावे लागले. हा प्रकार गुरूवारी ११ डिसेंबरच्या दुपारी २ वाजताच्या सुमारास जिल्हा क्षयरोग केंद्रात घडला. या घटनेबाबत क्षयरोग केंद्रातील सर्व कर्मचाऱ्यांनी जिल्हा शल्य चिकित्सकांना लिखीत तक्रार दिली आहे. रूग्णालयात दाखल करण्यात आलेला कर्मचारी वरिष्ठ उपचार प्रयोगशाळा पर्यवेक्षक पदावर कार्यरत असून पवन वासनिक असे त्यांचे नाव आहे. वासनिक हे गोंदिया व भंडारा या दोन्ही जिल्ह्यातील क्षयरोग कर्मचारी संघटनेच्या अध्यक्षपदी आहेत. त्यामुळे क्षयरोग कर्मचाऱ्यांवर होणाऱ्या अन्यायाला वाचा फोडण्याचे कार्य करतात.घडलेल्या या प्रकारानंतर क्षयरोग केंद्रातील सर्व कर्मचाऱ्यांनी जिल्हा क्षयरोग अधिकाऱ्यांची तक्रार केली. त्यानुसार प्रभारी जिल्हा क्षयरोग अधिकारी डॉ. विनोद वाघमारे हे अधिनस्त कर्मचाऱ्यांना नेहमीच मानसिक त्रास देतात. त्यात प्रामुख्याने दर महिन्याला पगार न करणे, कर्मचाऱ्यांचे टीए व डीए वेळोवेळी न देणे, जीपीएफ व सोसायटीच्या कर्मचऱ्यांच्या कर्ज देयकावर स्वाक्षरी न करणे, कर्मचाऱ्यांची हेतूपुरस्पर अनुपस्थिती लावणे, सुधारित राष्ट्रीय क्षयरोग निर्मूलन कार्यक्रमांतर्गत कर्मचारी दौऱ्यावर जाऊनसुद्धा हेतूपुरस्पर त्यांच्या दौऱ्यावर आक्षेप घेणे, कर्मचाऱ्यांना शासकीय कामाकरिता लागणारे स्टेशनरी फाईल्स, झेरॉक्स इत्यादी न पुरविने, तसेच कार्यरत कर्मचाऱ्यांना शासकीय कामासाठी लागणारे साहित्य टेबल, खुर्ची, कपाट इत्यादी वेळोवेळी निदर्शनास आणूणसुद्धा हेतूपुरस्पर विलंब करणे आदी बाबींचा समावेश आहे.अशा त्रासात कर्मचारी काम करीत असताना एखाद्या कर्मचाऱ्याचे बरेवाईट झाल्यास त्यास प्रभारी जिल्हा क्षयरोग अधिकारी डॉ.वाघमारे हे स्वत: जबाबदार असतील, असे निवेदनात नमूद केले. या सर्व कर्मचाऱ्यांनी जिल्हा क्षयरोग अधिकाऱ्यांना बदलविण्याची मागणीसुद्धा केली आहे. तक्रारकर्त्यांमध्ये क्षयरोग केंद्रातील वरिष्ठ लिपीक पी.एस. नगरारे, कनिष्ठ लिपिक ए.टी. गजभिये, प्रयोगशाळा तंत्रज्ञ ए.एम. लोणारे व आर.एम. रामटेके, शिपाही ए.डी. गुडपल्लीवार, पहारेकरी गिरीष तांबे, सफाईगार भरत मधूमटके, अधिपरिचारिका स्मृती वासनिक, वरिष्ठ उपचार पर्यवेक्षक हरीष चिंधालोरे, वरिष्ठ उपचार प्रयोगशाळा पर्यवेक्षक पवन वासनिक, योगिता अडसड यांचा समावेश आहे. (प्रतिनिधी)