आदिवासी सह.संस्थेत सात लाखांचा अपहार

आदिवासी विविध कार्यकारी सहकारी संस्था मर्या.सडक अर्जुनी (र.नं. १३३२) या सहकारी संस्थेच्या संचालकांनी

अंकेक्षण अहवाल सादर : आठ जणांवर गुन्हे दाखल सडक-अर्जुनी : आदिवासी विविध कार्यकारी सहकारी संस्था मर्या.सडक अर्जुनी (र.नं. १३३२) या सहकारी संस्थेच्या संचालकांनी अपहार झाल्याची तक्रार केल्यानंतर सहकारी संस्था देवरीच्या प्रमाणित लेखा परिक्षकांनी अंकेक्षण अहवाल सादर केला. त्यात ६ लाख ९९ हजार ३५ रुपयांचा अपहार झाल्याचे उघडकीस आले. त्यामुळे आठ व्यक्तीवर डुग्गीपार पोलिसांनी भादंवि कलम ४२०, ४०९ अंतर्गत गुन्हे दाखल केले आहे. संस्थेच्या उपविहित नमुद केल्याप्रमाणे संस्था आपल्या सभासदांना जिल्हा मध्यवर्ती अधिकोष यांचेमार्फत आवश्यक गरजेप्रमाणे अल्पमुदतीत किसान क्रेडिट कार्डधारकांना कर्जवाटप करणे, मध्यम मुदती कर्ज पुरवठा करणे, आदिवासी विकास महामंडळामार्फत आदिवासी सभासदांना खावटी कर्ज वाटप करणे, एकाधिकार हमीभाव, धान खरेदी व्यवहार हाताळणे हे उद्देश ठेवून संस्थेची प्रगती करणे महत्वाचे असते. असे असताना सडक-अर्जुनीच्या आदिवासी सहकारी संस्थेने चांगलाच उपक्रम राबविल्याचे दिसून आले. १ एप्रिल २०१४ ते ३१ मार्च २०१६ या कालावधीत संस्थेच्या काही लोकांनी सरकारी आणि शेतकऱ्यांचे असे मिळून ६ लाख ९९ हजार ३५ रुपये एवढी अफरातफर करुन शेतकऱ्यांची फसवणूक झाल्याचे तक्रारीच्या अनुषंगाने लेखा परीक्षक एस.बी. बिंझाडे यांनी दिलेल्या आपल्या अंकेक्षण अहवालात सिद्ध झाले. त्या अहवालाचा आधार घेऊन परीक्षक बिंझाडे यांनी डुग्गीपार पोलीस स्टेशनला तक्रार दाखल केली. आदिवासी सहकारी संस्थेत एवढा मोठा अपहार झाल्यामुळे परिसरातील शेतकऱ्यांचा सदर संस्थेचा विश्वास उडाला आहे. विश्वासघात करणाऱ्या आदिवासी सहकारी संस्थेच्या आरोपीवर त्वरित कारवाई व्हावी, अन्यथा आंदोलन करण्यात येईल असा इशारा संस्थेच्या इतर सदस्यांनी दिला आहे. (तालुका प्रतिनिधी) या आरोपींचा समावेश डुग्गीपार पोलीस स्टेशनला आलेल्या तक्रारीच्या अनुषंगाने ठाणेदार केशव वावळे यांनी संपूर्ण प्रकरणाची चौकशी करुन बिंझाडे यांच्या अंकेक्षण अहवालानुसार आणि तक्रारीनुसार आरोपी श्रीराम चमरु भोयर रा.तिडक, विशाल श्रीराम भोयर, मंमेश भारत मेश्राम, पवन देवराम कापगते, खालीलअली आविदअली सैय्यद, प्रमिलाबाई देवराम कापगते, सडक-अर्जुनी, शांतीबाई फुलचंद नागदेवे, तिडका बकाराम तुकाराम खोटेले, रा.केसलवाडा यांचा आरोपींमध्ये समावेश आहे. त्यांच्यावर डुग्गीपार पोलीस स्टेशन येथे कलम ४२० व ४०९ गुन्हा दाखल केला आहे.