तिरोडा : शून्य रॉयल्टी उपलब्ध नसतानाही परराज्यातून महाराष्ट्रात अनेक वाहने गौण खनिज घेऊन येतात, असेच रेती भरून परराज्यातून येणाऱ्या एकूण ६ टिप्परला पकडून त्यांच्यावर १६ लाख ६२ हजार रुपयांचा दंड ठोठवण्यात आला आहे. ही कारवाई १७ फेब्रुवारीच्या पहाटे ४ वाजताच्या सुमारास करण्यात आली. तिरोडा येथे नुकतेच रुजू झालेले उपविभागीय अधिकारी अजयकुमार नाष्टे, महसूल प्रशासन व पोलीस प्रशासनाने संयुक्तपणे ही कारवाई केली.
प्राप्त माहितीनुसार मध्य प्रदेशातून रेती भरलेले एकूण ६ टिप्पर खैरलांजी-तिरोडा मार्गाने येत होते. दरम्यान, उपविभागीय अधिकारी नाष्टे यांच्या मार्गदर्शनात तहसीलदार प्रशांत घोरुडे व महसूल विभागाचे इतर अधिकारी व पोलीस प्रशासनाने कारवाई करून सदर टिप्पर जप्त करून तहसील कार्यालय परिसरात जमा केले. जप्त करण्यात आलेल्या टिप्परमध्ये सौरभ ठामेंद्रसिंह चौहान रा.तिरोडा याचा टिप्पर क्रमांक एमएच-३६/एए-२३५८ व एमएच-३६/एए-१२५१, सुनील बचवानी रा. तिरोडा याचा टिप्पर क्रमांक एमएच-४०/बीजी-०५४०, गणेश देशमुख रा.ता. हिंगणा, जिल्हा नागपूर याचा टिप्पर क्रमांक एमएच-४०/बीएल-४३६२, हरिष अशोक बांदे रा. नागपूर याचा टिप्पर क्रमांक एमएच-४०/बीजी-४४५२ व उमेश शहारे रा. दाभा, ता.जि. भंडारा याचा टिप्पर क्रमांक एमएच-३६/एफ-३५७३ यांचा समावेश आहे. सर्व टिप्पर जप्त करून तहसील कार्यालयात जमा करण्यात आले आहेत. प्रत्येकी ५ ब्रास रेती व एका वाहनावर दंड असा २ लाख ७७ हजार रुपये दंड, याप्रमाणे एकूण जप्त करण्यात आलेल्या रेती व ६ टिप्परवर एकूण १६ लाख ६२ हजार रुपयांचा दंड आकरण्यात आलेला आहे.
....
कोट
परराज्यातून आलेला वाळूचा साठा व निर्गतीबाबत कार्यपद्धती महाराष्ट्र शासनाने ५ फेब्रुवारी, २०२१ रोजी जाहीर केलेली आहे. त्या अनुषंगाने परराज्यातून जे गौण खनिज येतात, त्यामधील रॉयल्टीची १० टक्के रक्कम जिल्हा खनिज प्रतिष्ठानाला जमा करणे अपेक्षित आहे. त्यानंतर, ० रॉयल्टी प्राप्त करून त्यावर वाहतूक करणे अपेक्षित आहे. मात्र, बरीच वाहने परराज्यातून महाराष्ट्रात येत असताना, शून्य रॉयल्टी त्यांच्याकडे उपलब्ध नसल्यामुळे ते वाहने जप्त करून तहसील कार्यालयात लावण्यात आलेले आहेत. वसुलीची कारवाई त्यांना नोटीस बजावून करण्यात येत आहे.
- प्रशांत घोरुडे, तहसीलदार, तिरोडा