गोंदिया : चोरीच्या प्रकरणात आमगाव तालुक्यातील कुंभारटोली येथील आरोपीला स्थानिक गुन्हे शाखेच्या पथकाने अटक केली होती. अटकेत असलेल्या आरोपीचा पोलीस कोठडीतच मृत्यू झाल्याची घटना शनिवारी (दि. २२) सकाळी ५.१५ वाजता उघडकीस आली. यामुळे आमगाव शहरात चांगलेच वातावरण तापले होते. राजकुमार अभयकुमार धोती (वय ३०, रा. कुंभारटोली) असे मृताचे नाव आहे.
आमगाव येथील जिल्हा परिषद शाळेतून दोन वेळा संगणक संच व एलसीडीची चोरी करण्यात आली आहे. या चोरीचा छडा लावताना स्थानिक गुन्हे शाखेच्या पथकाने कुंभारटोली येथील राजकुमार अभयकुमार धोती (वय ३०), सुरेश धनराज राऊत (३१) व राजकुमार गोपीचंद मरकाम (२२) यांना संशयावरून अटक केली, तर एक विधिसंघर्षित बालक असल्याने त्याला अटक करण्यात आली नाही. या प्रकरणात तिघांकडून एलसीडी व इतर साहित्य स्थानिक गुन्हे शाखेच्या पथकाने जप्त केले. पथकाने या तिघांना शुक्रवारी (दि.२१) रात्री १ वाजतादरम्यान आमगाव पोलिसांच्या स्वाधीन केले. मात्र, कोठडीत असताना राजकुमार धोती याचा शनिवारी (दि.२२) पहाटे ५.१५ वाजता मृत्यू झाला. या प्रकरणाची नोंद आमगाव पोलिसांनी घेऊन हे प्रकरण तपासासाठी सीआयडीकडे दिले आहे. राजकुमार धोतीच्या मृतदेहावर उत्तरीय तपासणी करताना आमगावचे न्यायाधीश, उपविभागीय अधिकारी व तहसीलदार उपस्थित होते. त्यांच्यासमोर कॅमेरा सुरू ठेवून तपासणी करण्यात आली.
-------------------------
मृताच्या शरीरावर अनेक जखमा
मृत राजकुमार धोती याच्या शरीरावर विविध प्रकारच्या जखमा होत्या. पोलीस ठाण्यातून मृतदेह उचलून उत्तरीय तपासणीसाठी आमगावच्या ग्रामीण रुग्णालयात नेला असता तेथे त्याच्या शरीरावर अनेक ठिकाणी जखमा व व्रण असल्यामुळे मारहाणीमुळे त्याचा मृत्यू तर झाला नाही ना, अशी शंका येते. मारहाण केल्यामुळेच माझ्या भावाचा मृत्यू झाल्याचा आरोप मृताची बहीण हिने पोलीस ठाण्यात केला आहे. या प्रकरणाची सखोल चौकशी होण्याची गरज आहे.
-------------------------------
पोलीस निरीक्षकासह चौघेजण निलंबित (बॉक्स)
राजकुमार धोती याच्या मृत्यू प्रकरणात आमगाव पोलीस ठाण्यातील दोन अधिकारी व दोन कर्मचाऱ्यांना कारणीभूत ठरवून पोलीस अधीक्षक विश्व पानसरे यांनी तडकाफडकी निलंबित केले आहे. निलंबित करण्यात आलेल्या अधिकाऱ्यांमध्ये आमगावचे ठाणेदार सुभाष चव्हाण, सहायक पोलीस निरीक्षक महावीर जाधव, ठाणेदारांचा वाहनचालक पोलीस हवालदार खेमराज खोब्रागडे (ब.क्र.१०१४) व पोलीस शिपाई अरुण उईके (ब. क्र. १८७७) यांचा समावेश आहे. या चौघांना पोलीस मुख्यालयात संलग्न करण्यात आले आहे. आमगाव पोलिसांनी पोलिसांची प्रतिमा मलीन करून कायदा व सुव्यवस्थेचा प्रश्न निर्माण होईल असे कृत्य केले. त्यामुळे महाराष्ट्र पोलीस अधिनियम १९५१ चे कलम २५ व महाराष्ट्र पोलीस शिक्षा व अपील अधिनियम १९५६ मधील नियम ३ च्या पोटनियम (१-अ) (एक) (ब) अन्वये पोलीस अधीक्षकांनी त्या चौघांना निलंबित केले आहे.