गोंदिया : तिरोडा तालुक्यातील पुरवठा अधिकारी हे तक्रारदारांच्या तक्रारीकडे दुर्लक्ष करीत असून, तिरोडा येथील एका व्यक्तीला हाताशी धरून काम करीत आहेत, तसेच माहितीच्या अधिकारांतर्गत मागविलेली माहिती देण्यास टाळटाळ करीत आहे. त्यामुळे या प्रकरणाची सखोल चौकशी अधिकारी आणि त्या कर्मचाऱ्यावर कारवाई करण्याची मागणी दिलीप लिल्हारे यांनी अन्न व पुरवठा विभागाचे आयुक्त यांच्याकडे केली आहे. त्यांनीही याची दखल घेत, चौकशी करून अहवाल सादर करण्याचे निर्देश पुरवठा विभागाला दिले आहेत.
तिरोडा येथील तहसील कार्यालयातील पुरवठा विभागात मागील काही दिवसांपासून अनागोंदी कारभार सुरू आहे, तसेच येथील एका गॅस एजन्सीच्या संचालकाशी साठगाठ करून एका खासगी व्यक्तीला वाचविण्याचा प्रयत्न करीत असल्याचा आरोप दिलीप लिल्हारे यांनी केला आहे. पुरवठा विभागाला या संदर्भात लिल्हारे यांनी माहितीच्या अधिकारांतर्गत माहिती मागविली होती. या प्रकरणावर ३१ आगस्ट, २०२० रोजी सुनावणी करण्यात आली होती. तेव्हा संबंधित व्यक्ती १९९५ पासून पुरवठा विभागात कुठल्याच पदावर कार्यरत नसल्याची माहिती पुरवठा अधिकाऱ्यांनी दिली होती. मात्र, तो अद्यापही याच विभागात बसून कामे करीत असून, स्वस्त धान्य दुकानदारांना फसविण्याची धमकी देत असल्याचा आरोपही लिल्हारे यांनी केला आहे. पुरवठा अधिकारी याची दखल घेत नसल्याचे याची तक्रार तहसीलदारांकडे केली होती, पण दोन महिन्यांचा कालावधी लोटूनही त्यांनी या प्रकरणी कुठलीच कारवाई केली नाही. त्यामुळे खोटी माहिती पुरवून दिशाभूल करणाऱ्या पुरवठा अधिकाऱ्यावर निलंबनाची कारवाई करण्यात यावी, अशी मागणी लिल्हारे यांनी तक्रारीतून केली आहे. दरम्यान, याची नागपूर विभागाचे पुरवठा विभागाचे उपायुक्तांनी दखल घेत, या प्रकरणाची सखोल चौकशी करून अहवाल सादर करण्याचे निर्देश दिले आहेत.
............