आमगाव : तालुक्यातील अनेक गावातील पथदिवे मागील अनेक दिवसांपासून बंद आहे. त्यामुळे नागरिकांना रात्रीच्या वेळेस रस्त्यांवरून ये-जा करताना त्रास सहन करावा लागत आहे. त्यामुळे स्थानिक प्रशासनाने याकडे लक्ष देऊन ही समस्या दूर करण्याची मागणी गावकऱ्यांनी केली आहे.
स्थानिक नगरपरिषदेचा कारभार सध्या प्रशासकाच्या हाती असून, ग्रामस्थांच्या अडी-अडचणी दूर करण्यासाठी प्रशासकाने कोणतेही पाऊल उचलले नसल्याचे दिसत आहे. मागील अनेक महिन्यांपासून गावातील बनिया मोहला, कामठा चौक, गांधी चौक, बाजार चौक, माल्ही, कुमारटोली, पदमपूर, बनगाव येथील पथदिवे बंद आहेत. यामुळे रात्रीच्या वेळेस अंधारातून वाट शोधावी लागत आहे. यामुळे एखाद्यावेळेस अनुचित घटना घडण्याची शक्यता नाकारता येत नाही. नगरपालिका प्रशासकाने पावसाळा सुरू होण्यापूर्वी ज्या ठिकाणी पथदिवे बंद पडले आहेत ते सुरू करण्याची मागणी गावकऱ्यांनी केली आहे.