शेतकरी हतबल : दुबार पेरणीची पाळी, आवत्या पध्दतीचा वापरराजेश मुनिश्वर - सडक/अर्जुनीआर्द्रा नक्षत्रातही पावसाने पाठ फिरविल्याने सडक/अर्जुनी तालुक्यातील शेतकरी हतबल झाल्याचे दिसत आहे. मृग नक्षत्रात दोन ते तीन वेळा पावसाने हजेरी लावल्याने शेतकरी बांधवानी पऱ्हे करण्याचा सपाटा सुरू केला होता. त्यात मिळेल त्या संकरीत व सुधारित धानाचे वाण वापरून पऱ्हे भरले. तालुक्यात १० हजार २०० हेक्टर क्षेत्रात सिंचनाची सोय आहे. पण कोरडवाहू नऊ हजार ५९६ हेक्टर क्षेत्रातील पऱ्हे धानाची वाट लागली आहे. बहुतेक ठिकाणचे पऱ्हे वाळायला लागले आहे. यावर्षी बहुतेक शेतकऱ्यांना आता आवत्या पध्दतीचा वापर केल्याशिवाय पर्याय राहणार नाही. रोवणी पध्दतीने पूरक म्हणून दोन ते तीन बांध्या आता आवत्याच टाकावे लागेल, असे चित्र संपूर्ण तालुक्याला पहावयास मिळत आहे. तालुक्यात २२ हजार ८६७ हेक्टर क्षेत्र या पिकाखाली येणारे क्षेत्र आहे. रेंगेपार, कोकणा/जमी., मोगरा, खडकी/ बाम्हणी, सौंदड, कोसमतोंडी, पांढरी, चिरचाडी, मालीजुंगा, शेंडा, पूतळी, डोंगरगाव/डेपो, देवपायली, चिखली, वडेगाव, घोटी, डुंडा, मुरपार, हेटी, बोपाबोडी आदी ठिकाणी पंपाच्या भरवश्यावर काही निवडक शेतकऱ्यांनी रोवणीला सुरूवात केली आहे. पण पावसाच्या हुलकावणीमुळे रोवणी पुढे करावी की नाही, या विवंचनेत ते पडले असल्याची माहिती प्रगतीशील शेतकरी तुकाराम लंजे यांनी दिली आहे. मागील वर्षी पावसाचे पाणी बऱ्यापैकी आल्यामुळे पाण्याची पातळी जमिनीत खोलवर गेली होती. त्यामुळे यावर्षी जून महिन्यात पंपाचे पाणी सिंचनासाठी कमी जास्त प्रमाणात पूरत आहे. जुलै महिन्याच्या सुरूवातीच्या काळात पंपाचे पाईप १५० ते २०० फूट आत टाकल्यावरच पाणी पूरत असल्याची माहिती शेतकरी देत आहेत. पण वीजेच्या लंपडावामुळे पऱ्ह्यासाठीसुध्दा पाणी देणे म्हणजे तारेवरची कसरतच करावी लागत आहे. येत्या चार दिवसात निसर्गाचे पाणी न आल्यास दुबार पेरणीची दाट शक्यता असल्याची माहिती कोकणा/जमी. चे प्रगतीशील शेतकरी खेमराज भेंडारकर यांनी दिली आहे. आता फक्त येरे येरे पावसा, तुला देतो पैसा, पैसा झाला खोटा, पाऊस आला मोठा म्हणण्याची वेळ राुहिली आहे.
तालुक्यात पेरण्या खोळंबल्या
By admin | Updated: July 7, 2014 23:38 IST