मांसाहाराला लाजविणाऱ्या भोंबोळीची धूम

श्रावणात मांसाहार वर्ज्य असल्याने खवय्यांची चांगलीच कोंडी होते. मात्र त्याला पर्याय ठरणाऱ्या आणि शुद्ध शाकाहारी असलेल्या भोंबोळीने (मशरूम) सध्या गोंदियात धूम केली आहे.

४०० रुपये दर : पौष्टिक जीवनसत्त्वांनी परिपूर्णगोंदिया : श्रावणात मांसाहार वर्ज्य असल्याने खवय्यांची चांगलीच कोंडी होते. मात्र त्याला पर्याय ठरणाऱ्या आणि शुद्ध शाकाहारी असलेल्या भोंबोळीने (मशरूम) सध्या गोंदियात धूम केली आहे. चक्क ४०० रुपये किलो दर असतानाही खवय्यांकडून भोंबोळीची खरेदी केली जात आहे. पौष्टिक तत्त्वांनी भरपूर असणाऱ्या भोंबोळीची त्यामुळेच चांगली मागणी होत आहे.श्रावणात मांसाहार वर्ज्य असतो. परंतु विशिष्ट चव आणि पौष्टिकतेमुळे भोंबोळीची भाजी मांसाहाराला पर्याय असल्याचे खवय्ये मानतात. ही भाजी त्यांच्या जिभेचे चोचले पूर्ण करीत आहे. त्यामुळेच मांसाहारापेक्षाही अधिक भावात या भोंबोळीची हातोहात विक्री होत असल्याचे येथे दिसून येत आहे. सध्या ४०० रूपये प्रतिकिलो दराने भोंबोळीची विक्री होत आहे. एवढी महाग असतानाही या वनस्पतीजन्य भाजीचे चाहते मात्र खुल्या दिलाने ती खरेदी करून पार्टी करीत आहेत. आकाशात विजा कडाडल्या की, शेतशिवार व जंगलात भोंबोळी उगवते अशी ग्रामीण भागातील लोकांची मान्यता आहे. पांढऱ्या रंगाच्या शेंगासारख्या या भोंबोळीत अत्यंत पौष्टिक तत्व असल्याचे म्हटले जाते. गोंदियात महादेव मंदिराजवळील रस्त्याच्या कडेला भोंबोळी विक्रेत्यांची दुकाने सजतात. सकाळपासून विक्री करणाऱ्यांच्या अवती-भोवती लोकांची गर्दी नेहमी दिसून येते. वर्षातून एकदाच होणाऱ्या भोंबोळी खरेदीसाठी पुरूषांसह महिलांचीसुद्धा गर्दी दिसून येते.केवळ पावसाळ्यातील काही मोजक्या दिवसातच जंगली भागात उगवणाऱ्या या वनस्पतीची भाजी वर्षातून एकदा तरी खावी असा सल्लाही जाणकार देतात. शहरात आज ४०० रूपये प्रति किलो दराने भोंबोळीची विक्री होत आहे. मनोहर चौकात भोंबोळी घेऊन ग्रामीण भागातील महिला दुकाने थाटत असल्याने येथे भोंबोळीच्या चाहत्यांची हमखास गर्दी दिसून येते.भाव कितीही असो, मात्र या महिलांकडील माल हमखास विकला जातो, असाही रोजचा अनुभव आहे. यावरूनच भोंबोळीच्या चाहत्यांचा अंदाज बांधता येतो. (तालुका प्रतिनिधी) भोंबोळी शरीरासाठी पोषकभोंबोळी हा मशरूमचाच प्रकार आहे. शुद्ध मराठीत त्याला भूछत्र म्हटले जाते. पूर्ण उगवल्यावर त्याची छत्री तयार होते व त्यालाच ‘सात्या’ म्हटले जाते. ही एक प्रकारची वनस्पती असून तिच्यात प्रोटीन्स व कॅल्शियम भरपूर प्रमाणात असल्याने अतिशय चविष्ट व पोषक आहे. यासाठी वीज कडाडण्याची गरज नसते. परंतु यादरम्यान वातावरणातील नायट्रोजन (नत्र) जमिनीत गेल्याने ते उगविण्यासाठी पोषक वातावरण तयार होते. आर्द्रता, तापमान व प्रकाश मिळाल्यास भोंबोळी उगवते. वर्षातून एकदाच येणारी ही वनस्पती असून त्याचे सेवन करणे फायदेशीर असल्याचे वनस्पतीशास्त्राचे अभ्यासक आणि आहारतज्ज्ञही सांगतात.