गोंदिया : मी केलेला प्रपोज नाकारला म्हणून गोंदियातील अल्पवयीन मुलीला व तिच्या आईला तलवारीने मारायला गेलेल्या तरुणाची तलवार गोंदिया शहर पोलिसांनी जप्त केली. आरोपीला अटक करून न्यायालयात हजर केले असता न्यायालयाने त्या आरोपीची तुरुंगात रवानगी केली आहे.
मुकेश विनोद तांडेकर (३०, रा. गौतमनगर बाजपाई वॉर्ड गोंदिया असे अटक करण्यात आलेल्या आरोपीचे नाव आहे. आरोपी मुकेश विनोद तांडेकर (३०) याने एका १६ वर्षांच्या मुलीला प्रपोज केले. तिच्याशी प्रेमसंबंध ठेवण्यासाठी त्याने १० ऑगस्ट २०१९ पासून ३० जुलै २०२१ या काळात तिचा वारंवार पाठलाग केला; परंतु त्याच्या प्रेमाला त्या मुलीने नकार दिल्यामुळे आरोपी ३० जुलै रोजी तिच्या घरी तलवार घेऊन गेला. तिला व तिच्या आईला तलवारीने ठार करण्याची धमकी दिली. यासंदर्भात आरोपीविरुद्ध शहर पोलीस ठाण्यात भादंवि कलम ३५४ (अ), ३५४ (ड), ४५२, ५०९, ५०४, ५०६ सहकलम १२ बाललैंगिक अत्याचार अधिनियम कलम ४, २५ भारतीय हत्यार कायदा कलम १३५ महाराष्ट्र पोलीस कायद्यान्वये गुन्हा दाखल केला आहे. आरोपी हा गुन्हेगारी प्रवृत्तीचा असल्याने त्याच्यावर यापूर्वी गोंदिया शहर पोलिसांत विविध प्रकारचे सहा गुन्हे दाखल आहेत. त्याच्याविरुद्ध गोंदिया शहर पोलीस ठाण्यात सन २०११ मध्ये मारामारीच्या कलम ३२४ अंतर्गत, जुगाराचा गुन्हा दाखल आहे. सन २०१२ मध्ये अल्पवयीन मुलीच्या अपहरण प्रकरणात कलम ३६३ अंतर्गत, सन २०१४ मध्ये बलात्काराचा गुन्हा, २०१५ मध्ये चोरीचा गुन्हा तर २०२० मध्ये जुगाराचा तर आता विनयभंगाचा गुन्हा दाखल करण्यात आला. आरोपी हा गुन्हेगारी प्रवृत्तीचा असल्याचे ठाणेदार महेश बनसोडे यांनी सांगितले आहे. या प्रकरणाचा तपास साहाय्यक पोलीस निरीक्षक महादेव सीद करीत आहेत.