तालुका कृषी कार्यालय संघाची सरशी ()

कृषी विभागाच्यावतीने गोंदिया येथे जिल्हास्तरीय सारस क्रीडा महोत्सव घेण्यात आला. त्यात तालुका कृषी अधिकारी कार्यालय अर्जुनी-मोरगावच्या संघाने विविध स्पर्धेत सहभाग घेतला होता. सांघिक खेळातील कबड्डी, क्रिकेटमध्ये प्रथम क्रमांक पटकावून जिल्ह्यात वर्चस्व स्थापन केले. वैयक्तिक खेळामध्ये गोळाफेक यात सागर राजगिरे यांनी प्रथम क्रमांक, बुध्दीबळ स्पर्धेत राजेश चौधरी यांनी द्वितीय क्रमांक, १०० मीटर रनिंग ४० वर्षाखालील गटात प्रमोद मेश्राम तसेच ४० वर्षावरील गटात डी. एम. शहारे यांनी द्वितीय क्रमांक मिळविला. स्पर्धेत यश मिळवून कृषी कर्मचाऱ्यांनी आपल्यातील दडलेल्या कलागुणांना वाट मोकळी करून दिली. तालुका कृषी कार्यालय संघाने जिल्हास्तरीय क्रीडा महोत्सवात विजय संपादन केल्याने आनंदोत्सव साजरा केला. याप्रसंगी तालुका कृषी अधिकारी रवींद्र लांजेवार अध्यक्षस्थानी होते. मंडळ कृषी अधिकारी सुधीर वरखडे, कृषी पर्यवेक्षक प्रकाश मेश्राम, गजानन पुस्तोडे उपस्थित होते. स्पर्धेत यशस्वी झालेल्या कर्मचाऱ्यांचे पुष्पगुच्छ देऊन तालुका कृषी अधिकारी रवींद्र लांजेवार यांच्या हस्ते गौरविण्यात आले.