सालेकसाची सोनाली रुपेरी पडद्यावर

एखाद्या व्यक्तीच्या अंगी जन्मजात कलागुण असले तर त्याला कोणत्याही प्रशिक्षणाची फारशी गरज पडत नाही

छत्तीसगडी चित्रपटातील नायिका : अभिनय व नृत्य कलेतून घेतली भरारी लोकमत न्यूज नेटवर्कसालेकसा : एखाद्या व्यक्तीच्या अंगी जन्मजात कलागुण असले तर त्याला कोणत्याही प्रशिक्षणाची फारशी गरज पडत नाही आणि योग्य व्यासपीठ मिळाले तर कलागुणांना प्रदर्शित करण्याची संधी लाभते. असेच काही घडत आहे ते येथील सोनाली उर्फ आचल शहारे या मुलीसोबत. तिने आपल्या अंगी असलेल्या अभिनय व नृत्य कला या गुणांमुळे प्रभाव पाडला आहे. सोनालीने रूपेरी पडद्यावरील पदार्पणात छत्तीसगडी चित्रपटात भूमिका साकारली आहे. ४ जून १९९२ रोजी दलित कुटूंबात जन्माला आलेली सोनाली शहारे हिने बालपणापासून घरात अठराविश्वे दारिद्रय पाहिले. पानठेला लावून घरचा गाडा खेचणारे वडील सुखदास शहारे सोनाली १७ वर्षांची असतानाच सन २००८ मध्ये सोडून गेले. त्यामुळे आई शीला शहारे, भाऊ असीम व सोनाली यांच्यावर संकटाचे आभाळ कोसळले. यात सोनाली आणि तिच्या भावाचे शिक्षण सुध्दा अर्धवट राहिले. परंतु सोनालीच्या अंगी जन्मजात असलेल्या नृत्य व अभिनय कला तिच्या भविष्यात मैलाचा दगड ठरेल तिला हे कल्पनेत नव्हते. मागील वर्षी ती फोटो काढण्यासाठी येथील एटीएस स्टुडीओ मध्ये गेली असता तिची ओळख स्टुडीओचे संचालक अनिल सोयाम यांच्याशी झाली. सोयाम यांनी तिचा आकर्षक चेहरा आणि वागणूक बघून चित्रपटात काम करण्याची संधी मिळाली तर करशील का असा प्रश्न विचारला. यावर सोनालीने होकार दिला. सोयाम यांचे मित्र प्रणव झा हे छत्तीसगडी चित्रपटांचे निर्माता निर्देशक असून या दोघांची घट्ट मैत्री आहे. झा यांनी दोन वर्षापूर्वी बी.ए.फर्स्ट ईयर नावाचा छत्तीसगडी चित्रपट काढला व तो चित्रपट खूप गाजला होता. त्यामुळे त्याचा दुसरा भाग निर्मीत करावा असे वाटले व त्यांनी बी.ए.सेंकड इयर नावाचा चित्रपट काढण्याचा निर्णय घेतला. परंतु यावेळी चित्रपटात नवीन नायीका घेण्याचे ठरविले व नवीन मुलीच्या शोधात असतानाच त्यांनी सोयाम यांच्याशी संपर्क साधला असता सोयाम यांनी सोनालीबद्दल विस्तृत माहिती देत भेट करवून दिली. झा यांना सोनालीचा चेहरा आवडला व त्यांनी आपल्या चमूसह सोनालीचा स्क्रीन टेस्ट घेतली. त्यात सोनाली उत्तीर्ण झाली आणि तिला बी.ए.सेकड इयर या चित्रपटात मुख्य नायिका म्हणून अभिनय करण्याची सोनेरी संधी लाभली. सन २०१६ मध्ये चित्रपटाची शूटींग सुरु झाली. सदर चित्रपटाची शूटींग छत्तीसगड, मध्यप्रदेश, ओरीसा आणी केरळ या राज्यात करण्यात आली. चित्रपटात सोनालीचे नृत्य आणि अभिनय सर्वश्रेष्ठ दिसून आले. २६ मे २०१६ रोजी बी.ए.सेंकड इयर हे चित्रपट छत्तीसगडची राजधानी रायपूरसह इतर महत्वाच्या शहरात रिलीज करण्यात आला. सुरुवातीपासून प्रेक्षकांना चित्रपट खूप आवडला व मागील चार आठवड्यापासून राज्यातील १७ चित्रपटगृहांत सतत चालत असून सर्व प्रेक्षकांनी सोनालीचे नृत्य आणि अभिनय जास्त पसंत केले आहे. परंतु प्रेक्षकांना नायीका ही मूळत: महाराष्ट्र राज्यातील सालेकसा येथील राहणारी असल्याची माहितीही नसावी. सालेकसा तालुका छत्तीसगडी राज्याच्या सीमेलगत असून या तालुक्यात हिंदी, मराठी सह छत्तीसगडी भाषेचा मोठा प्रभाव आहे. त्यामुळे सोनालीला भाषेची अडचण आली नाही. मराठी व भोजपुरी चित्रपटाचा प्रस्ताव छत्तीसगडी चित्रपटात दमदार अभिनय व कला दाखविल्यानंतर त्या चित्रपटाला पाहून काही मराठी आणि भोजपुरी चित्रपटाच्या दिग्दर्शकांनी सोनाली सोबत संपर्क करुन आपल्या चित्रपटात नायीका बनविण्याचा प्रस्ताव पाठविला आहे. सोनालीनेही त्यांना सकारात्मक उत्तर दिले असून चित्रपटसृष्टीत सोनालीचे भविष्य प्रकाशाकडे वाटचाल करताना दिसत आहे. सोनाली सालेकसा तालुक्याची पहिली व एकमेव मुलगी चित्रपटात नायिका म्हणून पदार्पण करणारी आहे.