गोंदिया : रस्ते प्रवासासाठी सुरक्षित मानल्या जाणाऱ्या राज्य रस्ते परिवहन महामंडळाने आपल्या कर्मचाऱ्यांनाही प्रवासाप्रमाणेच कामावर व त्यानंतरही सुरक्षितता दिल्याचे दिसून येत आहे. येथील आगारातून सेवानिवृत्त झालेल्या कर्मचाऱ्यांना त्यांच्या म्हातारपणाचा पैसा लगेच देण्यात आला आहे. कित्येक अन्य विभागांमध्ये कर्मचारी सेवानिवृत्त झाल्यानंतर त्यांना त्यांच्या म्हातारपणासाठी जमा केलेल्या पीएफ व ग्रॅच्युईटीच्या पैशांसाठी फरफट करावी लागते. मात्र आगारातील सेवानिवृत्त कर्मचाऱ्यांना लगेच त्यांच्या सेवानिवृत्तीनंतर हे पैसे देण्यात आल्याचे कळले. यावरून प्रवाशांना प्रवासाच्या सुरक्षिततेची हमी देणारे राज्य रस्ते परिवहन महामंडळ तेवढीच सुरक्षितता आपल्या कर्मचाऱ्यांना देत असल्याचे दिसून येत आहे.
--------------------------
जिल्ह्यात एकूण आगार - २
अधिकारी - ६
कर्मचारी - १२२
बसचालक - १९७
वाहक - १५१
---------------------------
लगेच मिळाले पैसे
मे महिन्यात माझी सेवानिवृत्ती झाली असून मला पीएफ व ग्रॅच्युईटीचे पैसे मिळाले आहेत. आता फक्त सुट्ट्यांचा हिशेब उरला असून अन्य सर्व पैसे मिळाले आहेत. विभागात केल्यानंतर त्यांच्याकडूनही लगेच पैसे देऊन कर्मचाऱ्यांची सुविधा करण्यात आली आहे.
- नैनसिंह कुसराम
-------------------
आगारातून सेवानिवृत्त झाल्यानंतर म्हातारपणासाठी असलेले पीएफ व ग्रॅच्युईटीचे पैसे मिळाले आहेत. विभागाकडून आमचा हिशेब करण्यात आला आहे. त्यामुळे पैशांसाठी फरफट करावी लागली नाही. विभागात काम केले त्याचा मोबदला तसाच लवकर देण्यात आला.
- इब्राहिम शेख
---------------------------------
सेवानिवृत्त कर्मचाऱ्यांना त्यांच्या सेवानिवृत्तीचे पैसे देण्यात आले आहेत. मात्र काही कर्मचाऱ्यांच्या पेन्शनचा प्रश्न कायम आहे. तर काहींच्या सुट्ट्यांचा हिशेब अद्याप झालेला नाही. पेन्शनचा प्रश्न लवकर सोडवून दिल्यास त्या कर्मचाऱ्यांना सोयीचे होणार.
- सईद शेख (अध्यक्ष, एसटी कर्मचारी संघटना)
-----------------------------
कर्मचाऱ्यांच्या सेवानिवृत्तीचा हिशेब विभागाकडून त्वरित केला जातो. कर्मचाऱ्यांच्या हक्काचे पैसे असल्याने ते अडवून ठेवण्याचा प्रश्नच नाही. शिवाय याबाबत आतापर्यंत एकही तक्रार आली नाही. यामुळे सर्वांचा हिशेब झाल्याचे दिसत आहे.
- पंकज दांडगे (आगारप्रमुख, तिरोडा)