गोंदिया : कोरोना संसर्गाच्या अनुषंगाने गुरुवारी (दि.१७) एकूण ३,३१४ नमुन्यांची चाचणी करण्यात आली. त्यात १,१५४ नमुन्यांची आरटीपीसीआर तर २,१६० रॅपिड अँटिजन टेस्ट करण्यात आली. यात ३ नमुने कोरोना पॉझिटिव्ह आले. त्याचा पॉझिटिव्हिटी रेट ०.९ टक्के आहे. मागील आठवडाभरापासून कोरोना बाधितांचा ग्राफ सातत्याने डाऊन होत असल्याने, कोरोनाचा पॉझिटिव्हिटी रेट १ टक्क्यापेक्षाही कमी असल्याचे दिलासादायक चित्र आहे.
जिल्ह्यात कोरोनाची दुसरी लाट आता पूर्णपणे ओसरली आहे. तर बाधितांपेक्षा मात करणाऱ्यांची संख्या अधिक असल्याने कोरोना ॲक्टिव्ह रुग्णांची संख्या आता १०१ वर आली आहे. यापैकी ६३ रुग्ण गृहविलगीकरणात असून, उर्वरित रुग्ण शासकीय रुग्णालयात उपचार घेत आहेत. कोरोनाचा संसर्ग आटोक्यात असल्यानेच जिल्ह्यात अनलॉक करण्यात आले असून, जिल्ह्यातील सर्वच व्यवहार आता सुरळीत झाले आहे. त्यामुळे जिल्हावासीयांना थोडा दिलासा मिळाला आहे. गुरुवारी जिल्ह्यात ५ बाधितांनी कोरोनावर मात केली, तर ३ नवीन रुग्णांची नोंद झाली. काेरोना संसर्गाच्या अनुषंगाने आतापर्यंत १,८४,०१८ स्वॅब नमुने तपासणी करण्यात आले. त्यापैकी १,५८,६९४ नमुने निगेटिव्ह आले आहेत. कोरोना बाधितांचा शोध घेण्यासाठी रॅपिड अँटिजन टेस्ट केली जात आहे. याअंतर्गत १,९४,११९ नमुने तपासणी करण्यात आले. त्यापैकी १,७३,१९० नमुने निगेटिव्ह आले आहेत. जिल्ह्यात आतापर्यंत ४१,०६१ कोरोना बाधित आढळले असून, यापैकी ४०,२६३ जणांनी कोरोनावर मात केली आहे. सद्यस्थितीत १०१ कोरोना ॲक्टिव्ह रुग्ण असून, २९९ स्वॅब नमुन्यांचा अहवाल प्राप्त व्हायचा आहे.
..............
आतापर्यंत ३ लाख ७८ हजार नमुन्यांची चाचणी
कोरोना संसर्गाच्या अनुषंगाने जिल्ह्यात आतापर्यंत एकूण ३ लाख ७८ हजार १९७ नमुन्यांची चाचणी करण्यात आली आहे. यात १,८४,०१८ नमुन्यांची आरटीपीसीआर तर, १,९४,११९ नमुन्यांची रॅपिड अँटिजन टेस्ट करण्यात आली आहे. यात एकूण ४१,०६१ कोरोना बाधित आढळले.
..............
३ लाख २७ हजार नागरिकांचे लसीकरण
कोरोनाला प्रतिबंध लावण्यात लसीकरण हे महत्त्वपूर्ण ठरत आहे. त्यामुळेच कोरोना प्रतिबंधात्मक लसीकरणावर शासनाने भर दिला आहे. जिल्ह्यात आतापर्यंत एकूण ३ लाख २७ हजार ७१९ नागरिकांचे लसीकरण करण्यात आले आहे. यात २ लाख ४८ हजार ७८४ नागरिकांना पहिला तर ७८ हजार ९३५ नागरिकांना लसीचा दुसरा डोस देण्यात आला आहे.