लाचखोरांवर लगाम : लाचलुचपत प्रतिबंधक विभागाची कारवाईगोंदिया : तलाव लीजवर देण्यासाठी लाच मागणाऱ्या विस्तार अधिकाऱ्याला आणि बहिणीवर कारवाई न करता जप्त दुचाकी सोडून देण्यासाठी लाच मागणाऱ्या पोलीस शिपायावर लाचलुचपत प्रतिबंधक विभागाच्या पथकाने कारवाई केली आहे. यातील विस्तार अधिकाऱ्यावर भंडारा येथील पथकाने तर पोलीस शिपायावर गोंदियातील एसीबीच्या पथकाने बुधवारी कारवाई केली.सविस्तर असे की, बलमाटोला येथील रहिवासी असलेल्या एका शेतकऱ्यावर आणि त्यांच्या बहिणीवर २१ जून रोजी दवनीवाडा पोलीस ठाण्यात दारूबंदी कायद्यांतर्गत गुन्हा नोंद करण्यात आला. तसेच यात त्या शेतकऱ्याला अटक करण्यात आली. तसेच त्यांची दुचाकीसुद्धा जप्त करण्यात आली होती. दरम्यान वरिष्ठ पोलीस अधिकाऱ्यांना सांगून बहिणीला अटक न करण्यासाठी आणि जप्त केलेली दुचाकी सोडूून देण्याकरिता पोलीस शिपाई महीपालसिंह भुवनसिंह सोलंकी (ब.क्र.२०२१) याने त्या शेतकऱ्याला १० हजार रूपयांची मागणी केली. यावर फिर्यादीने ३० जून रोजी याबाबत गोंदियाच्या लाचलुचपत प्रतिबंधक विभागाकडे तक्रार नोंदविली. त्या तक्रारीच्या आधारे पथकाने गुरूवारी (दि.१०) सापळा लावला, मात्र फिर्यादीच्या वागणुकीवरून आरोपीला संशय आल्याने त्याने पैसे स्वीकारण्याचे टाळले. मात्र वरिष्ठ अधिकाऱ्यांचे नाव सांगून लाचेची मागणी केल्याप्रकरणी आरोपी पोलीस शिपाई सोलंकीवर दवनीवाडा येथे लाचलुचपत प्रतिबंधक कायद्यांतर्गत गुन्हा नोंदवून त्यास अटक करण्यात आली. दुसऱ्या कारवाईत, फिर्यादी कृष्णकुमार हरपाल बरमुंशी (३९, रा.कवलेवाडा) हे मस्त्यव्यवसाय संस्थेचे अध्यक्ष असून त्यांनी कवलेवाडा येथील तलाव पाच वर्षांकरिता लीजवर घेण्यासाठी २ जुलै रोजी अर्ज केला होता. सात हजार २०० रूपये या ठराविक रकमेतील दोन हजार ६०० रूपये त्यांनी त्याच दिवशी भरले. भरलेल्या पैशांची पावती मागून तलावात शिंगाडे लावायचे काय याबाबत त्यांनी आरोपी पंचायत समिती विस्तार अधिकारी महेंद्र शंकर उके (४९) यांना विचारले. त्यासाठी उके यांनी एक हजार रूपयांची मागणी केली. यावर बरमुंशी यांनी लाचलुचपत प्रतिबंधक विभागाच्या भंडारा पथकाकडे तक्रार दिली. त्यानुसार पथकाने सापळा रचून आरोपी उके यांना फिर्यादीकडून लाच घेताना रंगेहात पकडले. (शहर प्रतिनिधी)
विस्तार अधिकाऱ्यासह पोलीस शिपाई जाळ्यात
By admin | Updated: July 9, 2014 23:35 IST