गोंदिया : मागील मार्च महिन्यापासून कोरोनाचा कहर सुरू असून, तेव्हापासून शाळा बंद आहेत. मुलेही घरातच आहेत. यामुळे त्यांना घरातच आपला विरंगुळा म्हणून मोबाईल, कॉम्प्युटर आणि टीव्ही हीच साधने उरली आहेत. त्यात शाळा प्रत्यक्ष सुरू नसल्या तरीही ऑनलाईन शिक्षणाने त्याची जागा घेतली असून, यामुळे मुलांना क्लासेससाठी मोबाईलवर लागून राहावे लागत आहे. यामुळे आता मात्र त्यांना डोळ्यांची समस्या जाणवू लागली आहे. शिवाय घराबाहेर जाता येत नसल्याने ते दिवसभर मोबाईलवर गेम खेळतात. मोबाईल लागून राहात असल्याने मुलांना डोळ्यांचा थकवा, डोकेदुखी व चष्मा लागणे आदी त्रास होत आहेत. कित्येक मुलांना लहानपणापासूनच चष्मा लागत असल्याचे दिसत असून, यामुळेच आता मुलांच्या या समस्या पालकांसाठीही डोकेदुखी ठरत आहेत. अशात यावर वेळीच आपल्या डॉक्टरांशी बोलून उपचार करण्याची गरज आहे.
---------------------------------
लहान मुलांना हे धोके
- सतत मोबाईलवर लागून राहिल्याने डोळे शुष्क होतात, पाणी येते, लाल होतात.
- मायोपिया असलेल्या मुलांचा चष्म्याचा नंबर वाढतो.
- सतत मोबाईल किंवा कॉम्प्युटरवर लागून राहिल्याने डोके दुखते.
- सतत मोबाईल पाहात राहिल्याने डोळ्यांना थकवा जाणवतो.
----------------------------------
लहान मुलांमध्येही डोकेदुखी वाढली
१) दिवसभर मोबाईल हाती घेऊन बसत असल्यामुळे डोळे व त्यातून डोक्यावर ताण येत असून, यामुळेच डोकेदुखीचा त्रास जाणवत आहे.
२) मोबाईल हाती असताना आपल्या पापण्या मिचकविण्याचे प्रमाण कमी होते व त्यामुळे डोळे शुष्क होऊन अन्य तक्रारी वाढतात.
३) मोबाईल जवळ धरून ठेवत असल्यामुळे जवळ बघण्याची प्रवृत्ती वाढते. त्यामुळे डोळ्यांच्या अन्य हालचाली होत नसून, स्नायूंवर त्याचा परिणाम होतो.
-------------------------------------
पालकही चिंतेत
कोरोनामुळे मागील वर्षापासून मुले घरातच असून, त्यांना बाहेर जाणे बंद केले आहे. अशात दिवसभर घरात राहून ते वैतागल्याने सतत मोबाईल, टीव्ही व कॉम्प्युटरवर लागून असतात. त्यात आता शाळा बंद असल्याने ऑनलाईन क्लासेसच्या माध्यमातून त्यांचा अभ्यास सुरू आहे. म्हणजेच, त्यासाठीही सतत मोबाईलवर लागून राहावे लागत आहे. यामुळे मात्र मुलांमध्ये डोळ्यांच्या समस्या आता वाढत आहेत.
- दीपक मेश्राम
---------------------------------
कोरोनाचा शिरकाव झाला व तेव्हापासून शाळा बंद आहेत. शिवाय कोरोनाच्या भीतीमुळे लहान मुलांना घराबाहेर जाऊ देण्यावर बंदी लावण्यात आली आहे. यामुळे ते घरातच असून, मोबाईल व टीव्हीवर आपला दिवस घालवतात. आता ऑनलाईन शिक्षण सुरू झाल्याने त्यांना मोबाईलवरच शिक्षण घ्यावे लागत आहे. यामुळे मात्र त्यांना डोळ्यांचा थकवा, डोळ्यातून पाणी येणे, डोळे लाल होणे यांसारख्या समस्या जाणवत आहेत.
- पवन शिंदे
------------------------------
कोट
सतत मोबाईल, कॉम्प्युटर किंवा टीव्हीसमोर बसून असल्याने लहान मुलांमध्ये डोळ्यांचा त्रास वाढत आहे. यासाठी सतत मोबाईलवर लागून न राहता मधामधात डोळे बंद करून ठेवावे किंवा उघड-बंद करावे. ज्यांना चष्मा आहे त्यांनी एंटी ग्लेअर ग्लासेस लावावे किंवा लॅपटॉप असल्यास त्याला एंटी ग्लेअर ग्लास लावावे. तरीही त्रास होत असल्यास आपल्या डॉक्टरांशी संपर्क साधावा.
- डॉ. कविता एस. भगत, नेत्ररोग तज्ज्ञ, गोंदिया.