गोंदिया : कोरोनाची दुसरी लाट जिल्ह्यातून पूर्णपणे ओसरली असून, बाधितांचा ग्राफ सातत्याने खाली येत आहे. सध्या जिल्ह्यात ११ कोरोना ॲक्टिव्ह रुग्ण असून, जिल्ह्याची कोरोनामुक्तीच्या दिशेने वाटचाल सुरू आहे. जुलै महिन्यात सलग सहाव्यांदा बाधित आणि मात करणाऱ्या रुग्णांची शून्य नोंद झाली आहे.
कोरोना संसर्गाच्या अनुषंगाने सोमवारी (दि.२६) १७६ नमुन्यांची तपासणी करण्यात आली. यापैकी १५० स्वॅब नमुन्यांची आरटीपीसीआर तर २५ नमुन्यांची रॅपिड अँटिजन टेस्ट करण्यात आली. यात एकही नमुना कोरोनाबाधित आढळला नाही. मागील आठवडाभरापासून बाधित रुग्णांची संख्या सातत्याने कमी होत असल्याने, कोरोनाचा संसर्ग आता पूर्णपणे आटोक्यात आल्याचे चित्र आहे. कोरोनाला जिल्ह्यातून पूर्णपणे हद्दपार करण्यासाठी नागरिकांनी कोरोना प्रतिबंधात्मक नियमांचे काटेकोरपणे पालन करण्याची गरज आहे. कोरोना संसर्गाच्या अनुषंगाने आतापर्यंत २,१४,५४२ नमुने तपासणी करण्यात आले. त्यापैकी १,८९,४४४ नमुने निगेटिव्ह आले. कोरोनाबाधितांचा त्वरित शोध घेण्यासाठी रॅपिड अँटिजन टेस्ट केली जात आहे. याअंतर्गत २,२१,६८२ नमुने तपासणी करण्यात आले. यापैकी २,००,५९२ नमुने निगेटिव्ह आले. जिल्ह्यात आतापर्यंत ४१,१२८ कोरोनाबाधित आढळले असून, यापैकी ४०,४७० बाधितांनी कोरोनावर मात केली आहे. सद्यस्थितीत ११ कोरोना ॲक्टिव्ह रुग्ण आहेत.
..................
कोरोनाचा रिकव्हरी रेट ९८.२७ टक्के
कोरोनाबाधितांपेक्षा कोरोनावर मात करणाऱ्यांची संख्या अधिक असल्याने कोरोनाचा रिकव्हरी रेट सातत्याने वाढत आहे. जिल्ह्याचा रिकव्हरी रेट ९८.२७ टक्के असून, तो राज्याच्या रिकव्हरी रेटपेक्षा जिल्ह्याचा रिकव्हरी रेट २ टक्क्यांनी अधिक आहे.