गोंदिया : अलीकडे सुलभ आणि वेगवान संपर्काचे माध्यम म्हणून शासकीय कामकाजात मोबाइलचा वापर अपरिहार्य बनला आहे; परंतु मोबाइलवर बोलताना अपेक्षित शिष्टाचार पाळला जात नाही. अशा प्रकारच्या वर्तवणुकीमुळे शासनाची प्रतिमा मलीन होते. यासाठी शासकीय कार्यालयात मोबाइलवर जास्त बोलणे, जोराने बाोलणे, जास्त वेळ बोलणे याला बंदी घातली आहे. मोबाइलवर बोलताना काय काळजी घ्यायची, अशा सूचना सरकारने केल्या आहेत. गोंदिया जिल्ह्याच्या शासकीय कार्यालयात मोबाइलवर सतत बोलत असल्याचे चित्र आहे.
............................
१) काय आहे आचारसंहिता?
कार्यालयीन कामासाठी केवळ कार्यालयीन दूरध्वनीचा वापर करावा. कार्यालयीन वेळेत कार्यालयीन कामासाठी आवश्यक तेव्हाच मोबाइलचा वापर करावा. मोबाइलवर सौम्य आवाजात बोलावे, वाद घालू नये. कार्यालयीन कामासाठी मोबाइलचा वापर करताना टेक्स्ट मेसेजचा वापर करावा. मोबाइलवर आलेले अत्यावश्यक वैयक्तिक कॉल बाहेर जाऊन घ्यावेत.
......................................
काम नावाला, मोबाइल कायम कानाला
१) जिल्हा परिषद
गोंदियाच्या जिल्हा परिषदेत कर्मचारी मोठ्या प्रमाणात मोबाइलवर बोलत असतात. काम कमी आणि मोबाइलवर बोलणेच जास्त असते. शासकीय कामदेखील मोबाइलवरूनच केले जाते. त्यामुळे त्याचा आधार घेत अनेक कर्मचारी मोबाइलवरच लागले राहतात.
.....
२) वैद्यकीय महाविद्यालय गोंदिया
येथील वैद्यकीय महाविद्यालयातील कर्मचारी तासन्‌तास मोबाइलवर बोलत असतात. कोरोनामुळे आरोग्य यंत्रणा कामात व्यस्त आहे, असे जरी सांगत असले तरी आरोग्य विभागातील आस्थापनेतील कर्मचारी तासन्‌तास मोबाइलवर वेळ घालवित असतात.
................................
कार्यालय प्रमुख म्हणतात
कार्यालयीन कामासाठी आवश्यक तेवढाच मोबाइलवर बोलता येईल. स्वत:च्या खासगी कामाने मोबाइलवर बोलू नये. मोबाइलवर बोलताना इतरांना त्रास होणार नाही, याची काळजी घ्यावी. कार्यालयातील वरिष्ठांच्या कॉलला तत्परतेने उत्तर द्यावे.
- नरेश भांडारकर, उपमुख्य कार्यकारी अधिकारी (सामान्य प्रशासन) जि.प. गोंदिया.
......................
भ्रमणध्वनीवर कार्यालयीन कामकाजासाठी समाज माध्यमांचा वापर करताना वेळेचे व
भाषेचे भान असावे. अत्यावश्यक वैयक्तिक बोलायचे असेल तर कार्यालयाबाहेर जाऊन बोलावे, बैठकीत मोबाइलचा वापर करू नये, अशा शासनाच्या सूचना आहेत.- डॉ. नरेश तिरपुडे, वैद्यकीय अधिष्ठाता वैद्यकीय महाविद्यालय गोंदिया.
....................
सरकारी कार्यालय नको रे बाबा!
सरकारी कामकाजासाठी कार्यालयात गेल्यावर कर्मचारी आपल्या मोबाइलवरच मश्गूल असतात. माहिती घेण्यासाठी तासन्‌तास त्यांच्या पुढे बसूनही ते मोबाइलवरच असतात. त्यांच्या मोबाइल ठेवण्याच्या प्रतीक्षेत आम्हाला कंटाळा येतो.
-संघर्ष हुकरे, करंजी.
............
शासकीय कामकाजासाठी कार्यालयात गेल्यावर आम्हाला कर्मचारी प्रतिसाद देत नाहीत. संगणकावर गेम खेळत बसतात किंवा फोनवर तासन्‌तास माेबाइलवर बोलतात. माहिती घेण्याचा प्रयत्न केल्यावर रागवून टाळाटाळीची उत्तरे देतात.
- सौरभ गडपायले, इर्री.