पालिका लागली नाली सफाईच्या कामाला

पाऊस कधीही हजेरी लावणार असल्याचे चित्र निर्माण झाले असून त्यामुळेच नगर परिषदेने शहरात सफाई अभियान जोमाने राबविण्यास सुरूवात केली आहे. शहरातील नाल्यांची सफाई केली जात असून त्यातील कचरा

गोंदिया : पाऊस कधीही हजेरी लावणार असल्याचे चित्र निर्माण झाले असून त्यामुळेच नगर परिषदेने शहरात सफाई अभियान जोमाने राबविण्यास सुरूवात केली आहे. शहरातील नाल्यांची सफाई केली जात असून त्यातील कचरा व गाळ काढला जात असल्याचे दिसून येत आहे. शनिवारी मोहिमेंतर्गत शहरातील श्रीजी लॉंस लगतचा नाला जेसीबीच्या माध्यमातून साफ करण्यात आला. यातून मोठ्या प्रमाणात कचरा व गाळ काढून नाल्याची सफाई करण्यात आली. ७ जूनपासून मृग नक्षत्राला सुरूवात झाली आहे. त्यानंतर अद्याप पावसाने हजेरी लावली नव्हती. मात्र कधीही पाऊस हजेरी लावणार असल्याचे स्पष्ट चित्र निर्माण झाल्याने नगर परिषदेने शहराच्या आतील भागात असलेल्या नाल्यांच्या सफाईची स्वच्छता मोहीम हाती घेतली. शुक्रवारपासून पालिकेच्या स्वच्छता विभागाने ही मोहीम सुरू केली असून यात आंबेडकर चौक ते नेहरू चौक फुटपाथवरील अंडरग्राऊंड नाल्यांची सफाई करण्यात आली. तर शनिवारी श्रीजी लॉंसलगतच्या नाल्याची सफाई करण्यात आली. जेसीबी मशीनच्या माध्यमातून या नाल्याची सफाई करण्यात आली असून यातून मोठ्या प्रमाणात कचरा व गाळ काढण्यात आला. विशेष म्हणजे पालिकेने यापूर्वीच शहरातील मोठ्या नाल्यांची जेसीबीच्या माध्यमातून सफाई मोहीम राबविण्यात आली आहे. शहरातील नाल्यांमधून पाण्याची निकासी व्यवस्थित होत असल्याने पावसाने पाणी अडून राहणार नाही व शहरवासीयांच्या घरात शिरणार नाही. यासाठीच ही मोहीम राबविण्यात येत आहे. या सफाई अभियानांतर्गत मात्र नाल्यांमध्ये सर्वाधिक प्लास्टिक आढळून आल्याचे दिसून आले. हाच कचरा नाल्यांमध्ये अडकून नाल्यांमधून पाण्याची निकासी होत नसल्याने सांडपाणी शहरवासीयांच्या घरात शिरण्याचा धोका असतो. शुक्रवारी बरसलेल्या पावसाने पालिकेला हा धोका निर्माण होऊ शकणार असल्याचे संकेत दिलेच आहेत. आता नाल्यांची सफाई केल्याने कितपत धोक टळू शकतो हे बघायचे आहे. (शहर प्रतिनिधी)