गोंदिया-परसवाडा : मुलगा खड्ड्यांत पडल्याने त्याला वाचविण्यासाठी गेलेल्या आईचाही खड्ड्यांत बुडून मृत्यू झाला. तिरोडा पोलीस ठाण्यांतर्गत ग्राम मलपुरी ते मेंढा रस्त्याच्या बाजूला शनिवारी (दि. १४) दुपारी १.३० च्या दरम्यान ही घटना घडली. चिराग ललित ठाकूर (६) व पंचकुला ललित ठाकूर (३०, रा. मलपुरी) असे मृत मायलेकाचे नाव आहे.
ग्रामीण भागात सध्या रोवणीची कामे सुरू असून शनिवारी पंचकुला ठाकूर या थोरला मुलगा चिराग व धाकटा मुलगा सिराज ललित ठाकूर (६) यांना घेऊन शेतात गेल्या होत्या. त्या रोवणी करीत असताना चिराग व सिराज शेतात खेळत होते. खेळता-खेळता ते शेतातील खड्ड्याजवळ गेले व पाय घसरून चिराग त्यात पडला. ही बाब सिराजने आई पंचकुला यांना जाऊन सांगितली असता त्या त्याला वाचविण्यासाठी खड्ड्यात उतरल्या. मात्र, खड्डा खोल होता व पाणी भरून असल्याने दोघांचाही पाण्यात बुडून मृत्यू झाला. दोघांचे मृतदेह गावकऱ्यांनी खड्ड्यांतून बाहेर काढले व तिरोडा उपजिल्हा रुग्णालयात उत्तरीय तपासणीसाठी पाठविले. घटनेची माहिती मिळताच क्षेत्राचे आमदार विजय रहांगडाले, आमदार अभिजित वंजारी, माजी आमदार दिलीप बंसोड, गप्पू गुप्ता यांनी गावात भेट देऊन घटनेची माहिती घेतली. या घटनेची नोंद तिरोडा पोलिसांनी घेतली आहे.