...........
पत्नीला पतीने दिली ठार करण्याची धमकी
गोंदिया : शहराच्या कुंभारे नगरातील अशोक सम्राट चौकातील सुनीता संजय गणवीर (३५) यांनी १८ ऑगस्ट रोजी दुपारी २ वाजता आपल्या पतीला मुलाला दवाखान्यात घेऊन जा, असे म्हटले असता आरोपी संजय शालिकराम गणवीर (३९, रा. अशोक सम्राट चौक, कुंभारेनगर, गोंदिया) यांनी तिला शिवीगाळ करून ठार करण्याची धमकी दिली. या घटनेसंदर्भात संजय विरुद्ध गोंदिया शहर पोलिसात भादंविच्या कलम ५०४, ५०६ अन्वये गुन्हा दाखल केला आहे.
....
कलारीटोला येथील महिलेचा मृत्यू
गोंदिया : रावणवाडी पोलीस ठाण्यांतर्गत येणाऱ्या येथील शारदा चैतराम खांडवाये (२८) या महिलेचा २० ऑगस्ट रोजी सकाळी १०.४० वाजता गोंदियाच्या वैद्यकीय महाविद्यालयात मृत्यू झाला. तिला नातेवाइकांनी उपचारासाठी दाखल केले होते. डॉ. मोनल अग्रवाल यांनी तिला मृत घोषित केले. या घटनेसंदर्भात गोंदिया शहर पोलिसांनी आकस्मिक मृत्यूची नोंद केली आहे.
......
महिलेकडून दहा लिटर मोहफुलाची दारू जप्त
गोंदिया : शहर पोलीस ठाण्यांतर्गत येणाऱ्या कुंभारेनगरच्या रेल्वे चौकीजवळील प्रभा उत्तम मेश्राम (५०) या महिलेकडून १९ ऑगस्ट रोजी सायंकाळी ७.४५ वाजेच्या सुमारास पोलीस शिपाई महेंद्र ताजणे यांनी १० लिटर मोहफुलाची दारू जप्त केली. जप्त करण्यात आलेल्या दारूची किंमत एक हजार रुपये सांगितली जाते. या घटनेसंदर्भात गोंदिया शहर पोलिसांनी महाराष्ट्र दारूबंदी कायदा कलम ६५ ई अन्वये गुन्हा दाखल केला आहे.
......
ठार करण्याची धमकी
गोंदिया : शहराच्या पैकनटोली बजाजवॉर्ड गोंदिया येथील एका २२ वर्षांच्या वर्ग मैत्रिणीला आमगाव येथील आरोपी पंकज मोहबिया (२२) याने १८ ऑगस्ट रोजी रात्री ११ वाजता मोबाइलवर मेसेज करून लग्नासाठी प्रपोज केला. ते दोघेही एकाच वर्गात शिकत असताना त्या दोघांची ओळख होती. ते दोघेही मित्र असल्याचे त्या तरुणीने तक्रारीत म्हटले आहे. परंतु त्या तरुणीने लग्नाला नकार दिल्याने आरोपी पंकज मोहबीया याने तिला शिवीगाळ करून ठार करण्याची धमकी दिली. या घटनेसंदर्भात १९ ऑगस्ट रोजी गोंदिया शहर पोलिसांनी आरोपीविरुद्ध भादंवि कलम ५०४, ५०६ अन्वये गुन्हा दाखल केला आहे.
...................
तक्रार केली म्हणून ठार करण्याची धमकी
गोंदिया : येथील बाई गंगाबाई स्त्री रुग्णालयाच्या परिसरात १९ ऑगस्ट रोजी सायंकाळी ५ वाजता संध्या जितेंद्र गजभिये (५०, रा. डब्लिंग कॉलनी, गोंदिया) ह्या चहा दुकानात असताना आरोपी राहुल चिचखेडे (२५, रा. चिचटोली, छोटा गोंदिया) याने गंगाबाईसमोरील चहाच्या टपरीवर जाऊन तू माझ्या विरोधात तक्रार का दिली, असे बोलून तिला शिवीगाळ करून ठार करण्याची धमकी दिली. या घटनेसंदर्भात गोंदिया शहर पोलिसांनी आरोपीविरुद्ध भादंविच्या कलम ५०४, ५०६ अन्वये गुन्हा दाखल केला आहे.
.......................
महिलेकडून सात लिटर दारू जप्त
गोंदिया : शहर पोलीस ठाण्यांतर्गत येणाऱ्या गौतमनगर रेल्वे लाइनजवळील प्रभा संजय प्रेम (५०) या महिलेकडून १९ ऑगस्ट रोजी सायंकाळी ७.३० वाजता सात लिटर मोहफुलाची दारू पोलीस शिपाई सुमित गावंडे यांनी जप्त केली आहे. त्या महिलेविरुद्ध महाराष्ट्र दारूबंदी कायदा कलम ६५ ई अन्वये गुन्हा दाखल केला आहे.