गोंदिया : शहरात चार ठिकाणी चोरी करणाऱ्या दोन चोरट्यांना शहर पोलिसांनी अटक केली असून, या गुन्ह्यांचा उलगडा लावला आहे. तसेच या चोरट्यांकडून पोलिसांनी चोरी केलेला माल जप्त केला आहे.
शहरातील कुंभारेनगर निवासी राज सुधीर घरडे २४ जून रोजी बाहेरगावी गेले असता त्यांच्या घरातून एलईडी टीव्ही, होम थिएटर स्पीकर्स व रोख १५ हजार रुपये असा एकूण ३९ हजार रुपये किमतीचा माल लंपास करण्यात आला होता. प्रकरणी शहर पोलिसांत तक्रार नोंद असून, त्याचा तपास करीत असताना बातमीदाराकडून मिळालेल्या माहितीच्या आधारे पोलिसांनी राहुल लिलेश्वर पाल ऊर्फ इमरान सलीम शेख (२४, ह.मु. गौतमनगर) याला व अनुज जगदीश चौधरी (१९, रा.सूर्याटोला) यांना ताब्यात घेतले. विचारपूस केली असता दोघांनी आपला गु्न्हा कबूल केल्याने त्यांना अटक करण्यात आली. विशेष म्हणजे, दोघे सराईत गुन्हेगार असून, त्यांनी घरडे यांच्यासह आणखी तीन ठिकाणी चोरी केल्याचे कबूल केले. पोलिसांनी त्यांच्याकडून चोरलेले चार एलईडी टीव्ही, स्पीकर्स, दोन इलेक्ट्रिक मोटार, पितळी व काश्याची भांडी, वजन मशीन, इलेक्ट्रिक शेगडी, सेटटॉप बॉक्स असा एकूण ९८ हजार २०० रुपयांचा माल जप्त केला आहे. या दोघांना अटक करण्यात आल्यानंतर आणखी काही घटनांचा उलगडा होण्याची शक्यता असून, त्यानुसार पोलीस तपास करीत आहेत.