गोंदिया : कोरोनाचा वाढता उद्रेक बघता, जिल्हा प्रशासनाने आता कंबर कसली असून, मास्क न लावता फिरणारे, तसेच गर्दीच्या ठिकाणांवर नजर ठेवून कारवाई करण्यासाठी पथकांचे गठण केले आहे. यात नगरपरिषद अधिकारी-कर्मचाऱ्यांचे सर्वाधिक पथक असून, त्यांच्याकडे विविध जबाबदाऱ्या सोपविण्यात आल्या आहेत. याअंतर्गत पथकाने मंगळवारी (दि.२३) मास्क न लावता, फिरणाऱ्या ४९ नागरिकांना दणका देत, त्यांच्याकडून ८,९०० रुपयांचा दंड वसूल केला आहे.
जिल्ह्यात कोरोना बाधितांची संख्या वाढत आहे. अशात कोरोना विषयक उपाययोजनांचे पालन करणे आवश्यक झाले आहे. मात्र, त्यानंतरही जिल्ह्यात मास्क न लावता फिरणे, गर्दी करणे यासारखे प्रकार सुरूच आहेत. अशात आता नगरपरिषद व महसूल विभागाने सुमारे १९ पथकांचे गठन केले असून, त्यांना विविध जबाबदाऱ्या सोपविल्या आहेत. त्यानुसार, मंगळवारी यातील ६ पथकांनी मास्क न लावता फिरणाऱ्यांवर कारवाई केली आहे. यामध्ये मास्क न लावता फिरणाऱ्या ३९ नागरिकांना प्रती व्यक्ती १०० रुपये याप्रमाणे ३,९०० रुपयांचा दंड ठोठावून त्यांच्या दंड वसूल केला आहे.
नगरपरिषद आस्थापना विभाग प्रमुख मनिषा पारधी यांनी पथकासह प्रशासकीय भवन येथे पाहणी करून १० अधिकारी-कर्मचाऱ्यांना प्रती व्यक्ती ५०० रुपये याप्रमाणे ५,५०० रुपयांचा दंड ठोठावला आहे. विशेष म्हणजे, मंगळवारी उशिरापर्यंत पथकांकडून कारवाया सुरूच होत्या. पथकांच्या या कारवायांनंतर आता मात्र नागरिकांत कारवायांना घेऊन दहशत दिसून आली.