देवरी : या जगामध्ये सर्वप्रथम ग्रंथालय शास्त्रज्ञ शिक्षणाची सुरुवात अमेरिकेत सन १८८७ मध्ये मेलवील ड्यूई यांच्याद्वारे करण्यात आली. नंतर भारतात सन १९११ मध्ये बडोद्यात महाराज गायकवाड (तिसरे) यांच्या प्रयत्नामुळे प्रारंभ झाले. भारतात ग्रंथालय शास्त्राचे जनक डॉ. एस.आर. रंगनाथन यांनी ग्रंथालय शास्त्राची आधारशिला रोवली. सन १९५७ मध्ये भारतात पहिली पीएचडी पदवी जीडीबी कृष्णराव यांनी मिळवून देऊन विद्यापीठाचे नावलौकिक केले, असे प्रतिपादन डॉ. बाबासाहेब आंबेडकर फेलोशिप पुरस्कृत, ग्रंथमित्र ॲड. डॉ. श्रावण उके यांनी केले.
देवरी येथील श्रीमती कमलादेवी स्वरूपचंद जैन विद्यालयात शनिवारी आयोजित ८० ग्रंथ वितरण व सत्कार सोहळ्यात ते बोलत होते. कार्यक्रमाच्या अध्यक्षस्थानी येथील एम.बी. पटेल महाविद्यालयातील अर्थशास्त्र प्रमुख प्राध्यापिका डॉ. वर्षा गंगणे या होत्या. याप्रसंगी देवरीचे अधिवक्ता तथा नोटरी ॲड. प्रशांत संगीडवार, के.एस. जैन विद्यालयाचे प्राचार्य रजिया बेग व सत्कारमूर्ती ॲड. डॉ. श्रावण उके व त्यांचे कुटुंबीय यांचे स्वागतगीताने आणि पुष्पगुच्छाने स्वागत करण्यात आले. उपस्थित मान्यवरांनी ८० व्या वाढदिवसानिमित्त सत्कारमूर्ती ॲड. डॉ. श्रावण उके यांचा शाल, श्रीफळ देऊन सत्कार करण्यात आला. उके यांनी विद्यार्थ्यांना ८० पुस्तकांचा संच भेट म्हणून दिला. प्रास्ताविक प्राचार्य रजीया बेग यांनी केले तर संचालन प्रा. नरेश पटले यांनी व आभार योगराज बिसेन यांनी मानले.