‘ये शाम मस्तानी’ संगीतसंध्या आज

‘आला पुन्हा तो नव्यानं ओल्या मातीचा सुगंध, मन झाले एकवार पुन्हा बेधुंद’ अशा ओळींची आठवण देणारा पहिला पाऊस पडून गेला आहे.

सर्वांसाठी नि:शुल्क प्रवेश : प्रेक्षकांसाठी भरपूर बक्षिसे गोंदिया : ‘आला पुन्हा तो नव्यानं ओल्या मातीचा सुगंध, मन झाले एकवार पुन्हा बेधुंद’ अशा ओळींची आठवण देणारा पहिला पाऊस पडून गेला आहे. निसर्गाने हिरवाकंच शालू पांघरला आहे. धरणीमाता पावसाने चिंब झाली आहे. अशा या रोमॅँटिक वातावरणात हळूच सुरेल तान कानावर पडावी, मन बेभान होऊन नाचू गाऊ लागावं, असं वाटत असतं. नेमका या वातावरणाचा मूड ओळखून आपल्या असंख्य सदस्यांसाठी लोकमत सखी मंचकडून ‘ये श्याम मस्तानी...’ या संगीतमय कार्यक्रमाचे आयोजन रविवारी केले आहे. गोवा आणि महाराष्ट्रात लोकमत सखी मंचने आपल्या सदस्यांसाठी चौफेर कार्यक्रम घेत त्यांच्या मनात घर केले आहे. या कार्यक्रमाच्या स्वरुपात पुन्हा एकदा लोकमत सखी मंच आपल्या भेटीला येत आहे. या कार्यक्रमात असणार आहेत आपल्या मनातील गाणी, आपल्या आवडीची पाऊस गाणी, जी श्रोत्यांना मंत्रमुग्ध करून सोडतील. या कार्यक्रमाचे आयोजन रविवारी (दि.३१) साई मंदिर जवळील केमिस्ट भवन येथे संध्याकाळी ७ वाजता करण्यात आले आहे. सदर कार्यक्रम सर्वांसाठी नि:शुल्क आहे. लोकमत सखी मंच, युवा नेक्स्ट, बाल विकास मंचचे सभासद तसेच वाचकसुद्धा कार्यक्रमाला उपस्थित राहू शकतात. सदर कार्यक्रमाला स्व. यशवंतराव दयाराम चौरागडे यांच्या स्मृतीत यश इलेक्ट्रीक (फुलचूर) यांनी सहकार्य केले आहे. गोंदियावासीयांना या कार्यक्रमाला मोठ्या संख्येने उपस्थित राहून लाभ घेण्याचे आवाहन सखी मंचतर्फे करण्यात आले आहे. (प्रतिनिधी)